Бош мураббий раҳбарлар билан келишолмай қолди

Дэвид Мойес клуб эгалари билан муносабатлари ёмонлашгани сабабли “Эвертон” бош мураббийи лавозимидан истеъфога чиқиши мумкин.

Мойес ёзги трансфер ойнаси даврида The Friedkin Group томонидан етарлича қўллаб-қувватланмаганини ҳис қилмоқда. Дэвид январь ойига қадар таркибда атиги битта ҳужумчи билан қолди ва захира ўриндиғини тўлдириш учун ҳам футболчиларни зўрға топмоқда.

The Friedkin Group раҳбари Дэн Фридкин клубни сотиб олганидан бери “Эвертон”нинг бирорта ҳам уй учрашувига ташриф буюрмаган. Яқинда эса клуб эгалари жамоага сармоя киритишга унчалик қизиқмаётгани ва ташқи инвестор қидираётгани маълум бўлди.

Football Insider эксклюзив материалида хабар беришича, “Эвертон” ҳам Мойесга янги шартнома таклиф қилишга шошилмаяпти. Бу эса Дэвиднинг клубни ўз хоҳиши билан тарк этишига олиб келиши мумкин.

Мойеснинг иккинчи фаолияти даврида “Эвертон” сезиларли даражада кучайди ва Дэвид жамоани еврокубокларга олиб чиқишни мақсад қилган эди. Бироқ шотландиялик мутахассис кетса, жамоа яна Премьер-лигада қолиш учун курашиш ҳолатига қайтиш хавфи остида қолади.