“Борнмут”: Январда шу юлдузни сотмасак бўлмайди

«Борнмут» қишки трансфер ойнасида ярим ҳимоячиси Алекс Скоттни сотишга қарши эмас.

Ўтган ёзда «Борнмут» бошқа клубларнинг Скоттга бўлган қизиқишини рад этган. Жумладан, «Челси» Алекс учун 64 миллион фунт стерлинг таклиф қилган, аммо «Борнмут» бу таклифни қабул қилмаган.

Клуб дастлаб Скоттни сотиш ниятида эмаслигини билдирган. Бу қарор футболчининг ўзи ўтган мавсум охирида «Борнмут»нинг янги шартнома тузиш бўйича иккита таклифини рад этганига қарамай қабул қилинган.

BBC маълумотига кўра, яқинда «Борнмут» Скоттнинг вакиллари билан навбатдаги музокараларни ўтказган. Натижада Англиянинг жанубий соҳилида жойлашган клуб 23 ёшли футболчи 2028 йилгача амал қиладиган шартномасини узайтирмаслигини англаб етган.

Шу сабабли «Борнмут» январь ойида Англия терма жамоаси ярим ҳимоячисининг кетишига тўсқинлик қилмайди. Бироқ бунинг учун клуб Премьер-лигада жон сақлаб қолиш учун курашга қўшилиб қолмаслиги керак.

Ҳозирда «Борнмут» Скотт трансферидан тахминан 100 миллион фунт стерлинг ишлаб олишни умид қилмоқда. Футболчига «Челси»дан ташқари «Ливерпуль» ҳам қизиқиш билдирмоқда.

Ўтган ёзда Скоттнинг ўйинини кузатиб борган «Манчестер Сити», «Манчестер Юнайтед» ва «Тоттенхэм» эса ярим ҳимоя чизиғини бошқа футболчилар билан кучайтириб бўлган.