Бўлди, “Сити”дан кетаман!
- 23-сентябр, 10:25
- Zohir Toshxo’jayev
- 0
- Футбол
«Манчестер Сити» ярим ҳимоячиси Матео Ковачич қишки трансфер ойнасида клубини ўзгартириш ниятида.
Ковачич 2023 йилда «Челси»дан 30 миллион фунт эвазига «Манчестер Сити»га ўтганидан кейинги дастлабки икки мавсуми давомида жамоанинг асосий футболчиларидан бири бўлди. Бироқ ўтган мавсумнинг катта қисмини тўпиғидан олган жароҳати сабаб ўтказиб юборди.
Ёзда «Манчестер Сити»да бош мураббий ўзгарди ва Ковачич соғлом ҳолатда бўлишига қарамай, деярли ўйнамай қўйди. 32 ёшли ярим ҳимоячи жорий Премьер-лига мавсумида фақат икки марта захирадан майдонга тушди.
Ҳозир Ковачич Эллиот Андерсон, Аюб Буадди ва Энцо Фернандес билан рақобатда ортда қолмоқда. «Манчестер Сити» уларни таркибга қўшиш учун катта маблағ сарфлаган, Матео эса бундай вазият билан муроса қилишни истамаяпти.
Ковачични айниқса мавсум бошланишидан олдин бош мураббий Энцо Мареска ва спорт директори Угу Виана унга муҳим роль ва мунтазам ўйин амалиёти ваъда қилгани хафа қилмоқда. «Манчестер Сити» раҳбарларининг ушбу кафолатлари туфайли Матео Туркия, Саудия Арабистони ва Италия клубларининг қизиқишини рад этган.
Хорватиянинг Sportske Novosti нашри хабар беришича, Ковачич январь ойида, агар шу вақтга қадар кўпроқ ўйнай бошламаса, жамоани тарк этишни режалаштирмоқда.
Ковачичнинг «Манчестер Сити» билан шартномаси келаси ёзгача амал қилади, бироқ унда шартномани яна 12 ойга узайтириш банди мавжуд.