Бўлди, Левандовски “Барса”дан кетади!

37 ёшли Роберт Левандовски жорий мавсум охирида “Барселона”ни тарк этади. Бу ҳақда Польшанинг Meczyki нашри журналисти Томаш Влодарчик хабар берди.

Манба маълумотига кўра, 17 май, якшанба куни поляк футболчиси Ла Лиганинг 37-тури доирасида “Бетис”га қарши ўйинда “Камп Ноу”да хайрлашув учрашувини ўтказади.

Қайд этилишича, 37 ёшли ҳужумчининг фаолиятини давом эттириши учун энг эҳтимолий вариант Саудия Арабистони чемпионати ҳисобланмоқда, чунки футболчи учун вақт минтақаси, Европагача бўлган масофа ва иқлим муҳим аҳамиятга эга.

“Чикаго Файр”дан тушган таклиф ҳам кўриб чиқилмоқда, аммо у устувор эмас. Левандовскига “Порту” ҳам қизиқиш билдирган, бироқ ҳозирда футболчи асосан Яқин Шарқ вариантини ўрганмоқда.

Таъкидланишича, польшалик юлдуз футболчиси якуний қарорни яқин кунларда қабул қилади.

Шунингдек, ҳужумчининг каталонияликлардан янги шартнома бўйича таклифи борлиги, аммо у жамоадаги роли камайганини сабаб қилиб, бу таклифни қабул қилаётмагани айтилмоқда. Бу ҳолатда пул Роберт учун устувор эмас. Левандовски ўйнашни ва фаолиятини давом эттирадиган клуб натижаларига жиддий таъсир кўрсатишни истайди.

Аввалроқ “Барселона” ва Левандовски янги шартнома бўйича музокараларни тўхтатгани ҳақида хабарлар тарқалганди.

37 ёшли Роберт Левандовски 2022 йилдан буён “Барселона” сафида тўп тепиб келмоқда. Унинг клуб билан шартномаси 2026 йил июни охиригача амал қилади.