Бўлди етар! Топ-клуб сардори жамоани тарк этади

Англия Премьер-лигасида иштирок этаётган “Тоттенхэм” сардори Кристиан Ромеро жорий ёзги трансфер ойнасида Лондон клубини тарк этиши тобора ойдинлашиб бормоқда.

Talksport нашри маълумотига кўра, Ромеро аллақачон “Тоттенхэм” раҳбариятини ушбу трансфер ойнасида кетиш истаги борлиги ҳақида огоҳлантирган.

Яқинда матбуотда Ромеро Италиянинг амалдаги чемпиони “Интер” клуби билан музокаралар ўтказгани ҳақида хабарлар пайдо бўлди, аммо манбанинг таъкидлашича, 28 ёшли ҳимоячининг асосий устувор йўналиши Испания Ла Лигаси ҳисобланади.

Кўп ойлар давомида Кристиан Ромеро билан боғлаб келинаётган “Атлетико”дан ташқари, ҳозир аргентиналик футболчига “Барселона” ҳам жиддий қизиқиш билдирмоқда.

Ромеро 2021 йилда “Аталанта”дан ўтганидан буён “Тоттенхэм” шарафини ҳимоя қилиб келмоқда. Кристиан ўзини етакчи ва жонкуяр футболчи сифатида кўрсатган бўлса-да, интизом билан боғлиқ муаммоларга ҳам дуч келган ва баъзи ҳолларда клубини очиқ танқид қилган.