Боксчиларимиз Осиё чемпионатидаги юришини бошлади!

Индонезиянинг Жакарта шаҳрида старт олган, бокс бўйича Осиё чемпионатида биринчи бўлиб, U23 ёш тоифаси, -50 кг вазндаги вакилимиз Амирбек Исмоилов рингга кўтарилди.  У ҳиндистонлик амалдаги катталар ўртасидаги Осиё чемпиони Вишванатан Сурешга қарши баҳс юритди. Қийин кечган қарама-қаршиликда Исмоилов 0:5 ҳисобида имкониятни бой бериб қўйди.

-65 кг вазн тоифасидаги вакилимиз Илҳомжон Эргашев ҳам Осиё чемпионатида ўз юришини бошлади. 
У қатарлик Файсал Муҳаммадга қарши жанг қилди. Биринчи раунддан сўнг, рақиб жангдан бош тортди ва ғалаба вакилимизга топширилди.

-55 кг вазнда U23 тоифасидаги вакилимиз Фарёзбек Дўсматов, Осиё чемпионатининг илк босқичида филиппинлик Элжай Памиса билан тўқнаш келди. Жангни ажойиб тарзда ўтказган кичик Дўсматов ишончли тарзда 5:0 ҳисобида ғалабага эришди.

-60 кгдаги иқтидорли вакилимиз Абдураҳмон Маҳмуджонов ҳам Осиё чемпионатида биринчи жангини ўтказди. У мўғулистонлик Дулгуунсаихан Хархуга қарши қизиқарли баҳс ўтказди. Техник ва тактик жиҳатдан кучлироқ бўлган Маҳмуджонов якунда 5:0 ҳисобида зафар қучиб, ғалабали юришини бошлади.

Бу ҳақда Ўзбекистон Бокс федерацияси хабар бермоқда.