Бобур Абдухолиқов: "Мен учун қайси жамоага гол уришнинг фарқи йўқ"

Суперлиганинг 10-туридан ўрин олган “Пахтакор” — “Насаф” учрашуви 2:2 ҳисобида якунланди. Ушбу баҳсда сўнгги дақиқаларда гол уриб, жамоасини мағлубиятдан қутқариб қолган Бобур Абдухолиқов ўйин ҳақида фикр билдирди.

“Ассалому алайкум, ҳозирги кунда Ўзбекистоннинг энг яхши клубига қарши ўйнадик. Ҳисоб ҳақида гапирадиган бўлсак, биринчи голни ўзимизнинг хатомиз сабаб ўтказиб юбордик. Иккинчи бўлимда характер кўрсатиб гол урдик, лекин яна шундай хатога йўл қўйиб, иккинчи голни ҳам ўтказиб юбордик. Шунга қарамасдан жамоа охиригача характер кўрсатди.

Пенальти ҳақида гапирадиган бўлсам, уни кўрмадим, шунинг учун бу ҳақда ортиқча гапирмоқчи эмасман. Умуман олганда, ўз хатоларимиз сабаб кўп гол ўтказиб юбордик ва бу хатолар устида ишлаймиз.

Ўйиндан олдин Рўзиқул Бердиев билан суҳбатлашганимизда у менга мотивация берди ва бу менга қўшимча куч берди.

Мен учун қайси жамоага гол уришнинг фарқи йўқ. Ҳужумчи учун гол уриш муҳим. Бу мавсумда янада самарали бўлишга ҳаракат қиляпман. Ҳар бир ўйин бир хил кечмайди — баъзисида гол ураман, баъзисида эса йўқ.

Иккинчи бўлимда мураббийимиз томонидан ўзгаришлар киритилди, биз кўпроқ ҳужумга ўтдик, прессингни кучайтирдик ва шунинг эвазига гол уриб, ўйинни қутқариб қолдик.

Биринчисига келсак, биз биринчи бўлимда ҳам юқори прессингда ўйнадик, лекин у кутилган натижани бермади. Барибир бу “Пахтакор”га қарши ўйин эди, шуни ҳисобга олиш керак.”