Бизга Ҳусанов керак! Легионеримиз фаолиятида яхши ўзгариш бўлади
- 31-июл 2024, 22:25
- Zohir Toshxo’jayev
- 0
- Футбол
Абдуқодир Ҳусанов ўйнаётган Франциянинг “Ланс” клуби таркибида ўзгаришлар бўлиши кутилмоқда. Хусусан, жамоа ҳимояси етакчиси Кевин Дансо фаолиятини бошқа клубларда давом эттириши эҳтимоли ошиб боряпти.
Футбол экспертларидан Пьер Дреоссининг таъкидлашича, австриялик ҳимоячининг клуб билан яхши таклиф тушса, жамоадан кетиши рухсат берилиши борасида келишуви бор.
Уч йилдан бири “Ланс” етакчи ҳимоячиси вазифасини бажариб келаётган тажрибали марказий ҳимоячига Англия Премьер-лигасининг “Вест Хэм” ва “Вулверхэмптон”, Италиянинг “Аталанта” каби клубларидан жиддий чорловлар бўляпти.
Лансликлар Кевин Дансони 25 миллион евродан кам бўлмаган суммага қўйиб юборишга қарши эмаслигини билдирди. “Ланс” мураббийлар штаби ўзбекистонлик легионер Абдуқодир Ҳусановни Кевин Дансонинг асосий ўринбосари, деб билади. Умуман олганда, легионеримиз нафақат австриялик футболчи, балки ҳимоянинг Жонатан Градит, Фекундо Медина, Дейвер Мачадо каби бошқа тажрибали вакиллари учрашувда иштирок этолмаган ўйинларда ҳам уларнинг ўрнини муносиб ёпа олган. Шундай бўлса-да, 20 ёшли ҳимоячимиз ҳали “Ланс”нинг асосий таркибида муқим ўринга эга эмас.
Шу боис, “Ланс” фаолиятини ёритиб келаётган lensois.com сайти экспертлари “Кевин Дансонинг ҳимоядаги етакчилигини Абдуқодир Ҳусановга юклаш керакми?”, деган саволни ўртага ташлаб, мухлислар фикрини ўрганди.
Sports.uz портали франциялик мухлисларнинг Абдуқодир Ҳусановга асосий таркибдан муқим жой бериш бўйича билдирган фикр-мулоҳазаларини ўзбекистонлик футбол ишқибозлари эътиборига ҳавола этади.
BONDE62:
Албатта, Ҳусановни ўйнатиш керак. Йўқса, уни нега олиб келдик?
BASS:
Ҳар қандай ҳолатда ҳам Абдуқодир ўз имкониятига эга бўлишга лойиқ.
YF:
Муаммосиз ўйнаб кета олади.
MICHE:
Иккинлансамдан шундай қилиш керак. Бош мураббий Ҳусановдан ўйинларда кўпроқ фойдаланиш лозим. Ўтган мавсумдаги ўйинлар статистикасини бир қараб қўйишса ҳаммаси ойдинлашади.
Jeanou:
Ҳусановга имкон бериш керак. Лекин менимча, Абдуқодир Кевин Дансога эмас, Жонатан Градитга ўринбосар сифатида ўзини яхшироқ кўрсатди. Марказий ҳимоячи сифатида бош билан ўйнашни яхшироқ ўзлаштириши керак.
FAB:
Ҳусанов жамоага яхши қўшилиб кетди ва Лига 1 ўйинларига анча мослашиб қолди. Ўтган мавсумда ҳар бир ўйинидан қониқиш ҳосил қилдик.
Табиийки, Абдуқодир ўйинининг айрим жиҳатларини янада яхшилаши талаб этилади. Агар у ҳар ҳафта мунтахзам тарзда асосий таркибда майдонга тушса, тажрибаси ошади, даражаси кўтарилади ва ҳимоя чизиғида бир неча йил етакчилик қиладиган муҳим ўйинчига айланади.
CED:
Менинг фикримча, аслида Ҳусановни Дансога ўринбосар сифатида олиб келишган. Ўтган мавсумда яхши кўрсаткичларни қайд этди. Барибир қачондир Абдуқодирга асосий таркибда ўзини кўрсатиши учун имкон беришимиз га тўғри келарди.
ROLLMOPS:
Ҳусановни кўпроқ ўйнатиш керак. Ҳимоя марказида Фекундо Медина ва Жонатан Градит ҳам бош билан яхши ўйнолмайди. Абдуқодирни мана шу икки футболининг ўрнида ўйнатса ҳам яхши бўларди. Лекин жамоага бош билан яхши ўйнай оладиган бошқа марказий ҳимоячи керак.
Эслатиб ўтамиз, Франция чемпионатининг янги мавсуми 18 августдан бошланади. “Ланс” футболчилари илк учрашувини Лига 1 дебютанти “Анже” майдонида ўтказади.