Биз одамларнинг фикрини ўзгартира олмаймиз - Оминахон Валиханова билан самимий суҳбат

Ўзбекистон аёллар футболида янги авлод пайдо бўляпти - фидойи, жасур ва ўзига ишонадиган футболчилар. Шулардан бири - Омина Валиханова. У 3 йилдан буён профессионал футболда. Биринчи жамоаси "Пахтакор", ҳозирда эса "Локомотив" сафида тўп тепади. Шунингдек, у катта теннис, футзал ва футболни бир йўла олиб бораётган, шижоати билан ёш қизларга мотивация бераётган спортчи саналади. 

Биз у билан аёллар футболининг ички муаммолари, ривожланиш босқичи ва келажакка бўлган ишончи ҳақида самимий суҳбатлашдик:

- Сиз бир вақтнинг ўзида ҳам футзал, ҳам футбол жамоаларида ҳаракат қиляпсиз. Ҳар иккала йўналишда ўйнаш сизни қандай шакллантирмоқда?

- Ҳозирги кунда аёллар футболига ҳам эътибор қаратишяпти.Аввалгига нисбатан ўсиш борлигини ҳам кўришимиз мумкин. Қўлдан келганча, ҳамма нарса билан таъминлашга ҳаракат қилишяпти. Мен ўйлайманки,бу тўхтаб қолмайди, кундан-кунга яна ҳам эътибор ошади.Ўзингиз яхши биласиз, эътибор бўлган жойда, ўсиш, ривожланиш бўлади.

- Аёллар футболи ҳақида гап кетганда кўпинча "шароит етарли эмас", деган фикрлар қулоққа чалинади. Сизнингча, муаммо фақат инфратузилмадами ёки менталитет ҳам тўсиқ бўляптими?

- Менталитетга келадиган бўлсак, биз одамларнинг фикрини ўзгартира олмаймиз. Негатив фикрлар ҳам бўлади, тўғри тушунадиганлар ҳам бор. Шунинг учун, ҳамма олдига қўйган мақсади сари бошқаларни фикрига аҳамият бермаган ҳолда, юриши лозим. Агар инсон кимнингдир фикрига қарам ҳолда яшайдиган бўлса, ҳеч қачон ривожланмайди, юксалмайди. Шунинг учун ҳаммани ўз фикри, дунёқараши бор. Шунинг учун негативларни тўғри қабул қиламиз, бизни қўллаб-қувватлаб турганлардан эса мамнунмиз.

- Футбол ва футзал майдонида сизни ҳар доим энергияли, фидойи кўрамиз. Бироқ майдондан ташқарида Омина қандай инсон? Ўйин босими, танқидлар ва чарчоқ билан қандай курашасиз?

-  Учрашув давомида бор концентрация нафақат менда, балки бошқаларда ҳам фақат ўйинда бўлади. Ҳамма жон куйдиради ва натижа биз учун жуда ҳам муҳим. Бунда концентрацияда бўлиш катта аҳамиятга эга. Майдондан ташқарида Оминахон жуда қувноқ, позитив инсон деб бемалол айта оламан. Чарчоқлардан қутилишга келадиган бўлсак, уйқу ҳамда ўзим яхши кўрган иш билан шуғулланиб чарчоқни енгишга ҳаракат қиламан. 

Сизнингча, бугунги ёш футболчи қизлар нимага кўпроқ аҳамият бериши керак? Аёллар футболида муваффақият учун энг муҳим нарса истеъдодми, интизомми ёки ишонч? 

- Мени фикримча, футболчилар интернет тармоқларига қизиқиб бўш вақтларини ўтқазиб юбормаган ҳолда, мана шу ёш даври қайтиб келмаслигини инобатга олиб, бирор касбни эгаллашларини сўраган бўлардим. Қайси йўналишда бўлишдан қатъи назар, ўз йўлини топиб олиш муҳим. Мана шу ёши қайтиб келмаслигини унутмаган ҳолда, ҳаракат қилишларини хоҳлаган бўлардим. Аёллар футболида талант ҳам катта роль ўйнайди, лекин истеъдод бўлиб, меҳнат қилмаса, бу ҳеч қанақа натижа бермайди. Шунингдек, интизом ҳамма жойда катта роль ўйнайди. Интизом бор жойда муваффақият қозониш осон, ғалабаларга йўл ҳам айнан у орқали. 


 

Суҳбатлашди: Фотима Файзиева