Биринчи лигада Одил Аҳмедов футбол академияси РОПСТТМ ҳамкорлигида янги клуб ташкил этилди
- 15-феврал 2023, 15:43
- Javokhir Azimov
- 0
- Футбол
“Odil Ahmedov football academy” ҳамда Республика Олимпия ва паралимпия спорт турларига тайёрлаш маркази ўзаро ҳамкорликда “Олимпия” футбол жамоасини ташкил этди. ЎзПФЛ эса ўз Устави асосида мазкур жамоани Биринчи лига мусобақаси учун рўйхатдан ўтказди.
Лига Уставининг 4.3-бандида у ўз ташаббуси билан болалар-ўсмирлар футболини ривожлантираётган, футбол соҳасига хусусий инвестицияларни киритаётган ҳамда хусусий сектор томонидан ташкил этилган футбол клубларини кириш бадалини тўлаш шарти билан қатнашчилар сафига қабул қилиши мумкин эканлиги белгиланган. Аҳмедов футбол академиясида айни вақтда 9 ёш тоифасидаги жамоалар мавжуд бўлиб, улар сўнгги йилларда мунтазам равишда республика мусобақаларида иштирок этиб келмоқда. 5 йил давомида мазкур мактаб болалар-ўсмирлар футболида ўз ўрнига эга бўлиб улгурганлигини унинг тарбияланувчилари турли ёшдаги Ўзбекистон терма жамоаларига жалб қилинаётгани, бир нечта тарбияланувчи эса аллақачон профессионал шартнома имзолашга улгурганлиги билан изоҳлаш мумкин.
Республика Олимпия ва паралимпия спорт турларига тайёрлаш маркази билан ўзаро меморандум асосида академиянинг бир қатор футболчилари мазкур марказда таҳсил олади. Шунингдек, академия марказ спорт базасидан фойдаланиш шартида унинг инфраструктурасига инвестиция киритиб келади. Эндиликда ҳамкорлик натижасида ёш футболчилар Профессионал футбол лигаси томонидан ўтказиладиган мусобақаларга қадам қўяди. “Олимпия” Биринчи лигадан ташқари Ўзбекистон кубоги мусобақасида ҳам иштирок этиш имкониятига эга бўлади.
2022 йилги мавсумда Лига Самарқанднинг “Юниред” ҳамда Андижоннинг “Андижон СГС” жамоалари билан худди шу кўринишда ҳамкорлик қилганди. 2023 йилда “Дўстлик” Тошкент, “Олимпия” каби жамоалар лицензиялаш талаблари асосида профессионал футболга тайёрлаб борилади. Лига босқичма-босқич республиканинг давлат иштироки мавжуд бўлган футбол мактаблари ҳамда академияларини профессионал футбол билан боғлаш масалаларини шакллантириб бормоқда.
ЎзПФЛ матбуот хизмати