Бибисаранинг онаси шахмат Олимпиадасида Ўзбекистонга мухлислик қиляпти

Қозоғистонлик машҳур шахматчи Бибисара Асаубаеванинг онаси Лиана Танжарикова Самарқанд (Ўзбекистон)да ўтаётган Жаҳон шахмат Олимпиадасида қайси терма жамоаларга мухлислик қилаётгани ҳақида фикр билдирди, деб хабар беради Sports.kz.

«Ўзбекистондаги Олимпиадада ким учун қайғуряпман?

Мени бу ҳақда кўп сўрашади, жавоб эса оддий: мен икки давлат учун ҳам жон куйдираман.

Аёллар терма жамоаси — албатта, Қозоғистон! Бизнинг қизлар, Бибисара Асаубаева билан бирга, барча кучини ишга солиб, бу меҳмондўст заминда „олтин“ни қўлга киритишга интилишлари керак.

Эркаклар терма жамоасига келсак — бу ерда менинг симпатиям Ўзбекистон томонида. Ўғил болалар жуда ёш, жуда амбицияли ва беқиёс истеъдод эгалари. Жавоҳир Синдаров учун бутун юрагим билан қайғураман.

Мен Қозоғистоннинг жанубида туғилганман ва ўзбек маҳалласида вояга етганман. Шунинг учун мен учун бу рақобат эмас, балки икки яқин халқнинг умумий байрами», — дея таъкидлади Танжарикова ижтимоий тармоқларда.

Маълумот учун, Қозоғистон аёллар терма жамоаси мусобақа бошидан бери бешинчи марта кетма-кет ғалаба қозонди. Қозоғистонлик шахматчи қизлар Иордания, Колумбия, Греция ва Испания терма жамоаларини мағлуб этган.

Ўзбекистон эркаклар терма жамоаси эса беш турдан сўнг ўн жамоавий очко тўплаб, Ҳиндистон ва Германия билан биргаликда турнир жадвалида пешқадамлик қилмоқда.