Бибисара Асаубаева муваффақиятли мавсумга якун ясади

Қозоғистонлик шахматчи Бибисара Асаубаева ёзги мавсум ва натижалари ҳақида ўртоқлашди.

«Мана, ёз ҳам ниҳоясига етди. Унга Норвегияда старт бергандим — у ерда супертурнирда ғалаба қозондим. Ҳозир эса Парижда, оилам даврасида, ёзни кузатяпман. 7 та давлат, 10 та шаҳар, икки марта “олтин”, бир “кумуш”, икки “бронза”, жуда кўп шахмат ва меҳнат. Шу билан бирга, яқинларим ва дўстларим билан вақт ўтказишга ҳам улгурдим.

Албатта, бу жуда аъло ёз бўлди», — деб ёзди Бибисара ўзининг инстаграм саҳифасида.

Ёзги мавсум давомида Қозоғистон аёллар терма жамоаси етакчиси учта йирик халқаро мусобақада иштирок этиб, жами бешта нуфузли совринни қўлга киритди. Аввало, Норвегияда ўтказилган Norway Chess Women 2026 супертурнирида у классик шахмат бўйича ўзининг илк “олтин” медалини муддатидан олдин таъминлади.

Шундан сўнг август ойида АҚШнинг Сент-Луис шаҳрида ўтган Cairns Cup 2026 аёллар кубогида илк “бронза”сини қўлга киритди. Ой охирида эса Франциянинг Сен-Тропе шаҳрида бўлиб ўтган WR Women's Chess Tour 2026 фестивалида бирданига учта медалга сазовор бўлди: тезкор шахмат (рапид)да ғалаба учун иккинчи “олтин”, блиц турнири финалига чиққанлиги учун “кумуш” ва бутун Европа босқичи бўйича тўпланган очколар йиғиндисига кўра яна бир “бронза”ни қўлга киритди. Шу натижалар унга жаҳон сериясининг Гранд-финалига йўлланма берди.