Бернарду Силва трансферига рухсат тегди

Испания чемпионатида икки марта кетма-кет ғалаба қозонган “Барселона” клуби бош мураббийи Ханс-Дитер Флик “Манчестер Сити” ярим ҳимоячиси Бернарду Силва билан шартнома имзоланишини маъқуллади.

Бу ҳақда RAC1 хабар берди.

Аввалроқ футболчининг трансфери бўйича якуний қарор бош мураббий фикрига боғлиқ экани айтилганди. Бернарду Силванинг ўзи ҳам Каталония клубига ўтишга розилик билдирган.

Португалиялик футболчига “Атлетико Мадрид”, “Бенфика”, шунингдек Туркия, Франция, Италия ва Саудия Арабистони клублари ҳам чорлов юборган эди.

Бернарду Силванинг “Манчестер Сити” билан амалдаги шартномаси 30 июнь куни якунланади. У 2017 йилдан бери “шаҳарликлар” сафида тўп суриб келмоқда. Жорий мавсумда у барча мусобақаларда 53 та ўйинда қатнашиб, 3 та гол ва 5 та голли узатма муаллифи бўлди.