Бернарду Силва ўйнашни орзуси қилаётган клуб номи маълум бўлди

Европа матбуотида ярим ҳимоячи Бернарду Силванинг турли клубларга ўтиши ҳақидаги маълумотлар муҳокама қилиниши давом этмоқда.

Аввалроқ португалиялик футболчи клубдаги тўққизинчи мавсумидан кейин “Манчестер Сити”ни тарк этиши эълон қилинган эди.

The Touchline нашрининг Sky Sport журналистларига таяниб хабар беришича, Бернарду Силванинг ўзи “Барселона”да ўйнашни орзу қилади.

Каталония клуби ҳам август ойида 32 ёшини нишонлайдиган португалиялик футболчини олишга бефарқ эмас.

Бернарду Силва ўз кучини Испания чемпионатида синаб кўрмоқчи. Шу боис, у “Ювентус”дан келган таклифни қабул қилмади. Бир неча манбалар Мадриднинг “Атлетико” клуби тажрибали плеймейкерга 2+1 кўринишида шартнома берганини ёзди.

Бернарду Силва 2017 йилдан бери “Манчестер Сити” таркибидаги 459 та расмий учрашувда ўз ҳисобига 76 та гол ва 77 та голли узатмани ёздириб қўйган. Қайд этиш лозимки, нуфузли Transfermarkt портали футболчини 27 миллион еврога баҳоламоқда.