Белбоғли кураш. Нукусда Ўзбекистон кубоги беллашувлари ўтказилди

Жорий йилнинг 7-10 декабрь кунлари Нукус шаҳрида ёшлар ўртасида (U18) Ўзбекистон кубоги мусобақаси бўлиб ўтди. 

Ўзбекистон Республикаси спорт вазирлиги ҳамда Ўзбекистон белбоғли кураш федерациясининг тақвим —режасидаги мазкур мамлакат кубоги беллашувларида барча вилоятлар ва Тошкент шаҳридан 300 нафардан ортиқ спортчилар белбоғли курашнинг классик ва эркин йўналишида куч синашишди. 

Нукус олимпия ва паралимпия спорт турларига тайёрлаш марказида ўтган муросасиз беллашувларда Нозигул Сотволдиева (Андижон), Шаҳло Калмуратова (Қорақалпоғистон), Ҳасанбой Раҳимжонов (Наманган), Шоҳжаҳон Абдужабборов (Фарғона),  Толибжон Набижонов (Сирдарё) сингари ёшлар ўз вазн тоифаларида ғолибликка сазавор бўлишди.

Умумжамоа ҳисобида эса Андижон вилояти терма жамоаси энг кўп медаллар жамғариб, фахрли биринчи ўринни эгаллади. Иккинчи ўринни Наманган вилояти жамоаси қўлга киритган бўлса, учинчи ўрин мезбонлар жамоасига насиб этди. 

Мусобақа якунида ғолиб ва совриндорлар диплом, медаль ва эсдалик совғалари билан мукофотланишди. 

Илҳом РАҲМОНОВ тайёрлади