Бектемир Мелиқўзиевга жаҳон чемпиони унвони учун жангда рақибни енгиш йўли кўрсатилди

Boxingnews24.com нашри Ўзбекистонлик даъвогар Бектемир Мелиқўзиевнинг WBA версияси бўйича супер ўрта вазн чемпиони, мексикалик Хайме Мунгиага қарши эҳтимолий жангда қайси тактика унга ютуқ келтириши мумкинлиги ҳақида таҳлил берди.

WBA ушбу жангни расман тайинлади. Томонларга музокаралар ўтказиш учун 30 кунлик муддат берилган. Мунгиа учун Мелиқўзиевга қарши жанг чемпионлик камарини мажбурий ҳимоя қилиш ҳисобланади.

Нашр ёзишича, Мелиқўзиевнинг асосий кучи — оғир зарбалар ва узлуксиз корпусга ишлаш. 2016 йилги Олимпия ўйинлари совриндори чапақай жангчи, рақиб ҳаддан ташқари ҳужумга берилиб кетишини кутади ва шу пайтда чап қўл билан тўғри зарба йўллайди.

Айнан шу тўғри чап зарба Мунгиага қарши энг катта қуролга айланиши мумкинлиги таъкидланади. Тихуана шаҳридан бўлган боксчи олдинга катта текис ҳаракатлар билан ҳужумга ўтганда, олдинги елкасини тушириб, қўл тирсакларини кенг ёйиб юборади. Шу боис унинг ҳимояси очилиб қолади ва рақибга марказдан тўғри зарба бериш учун қулай йўлак очилади. „Канело“ айнан шу нуқсондан фойдаланганди: қисқа қарши апперкот билан Мунгианинг ҳимоясини ёриб ўтиб, уни нокдаунга юборган.

Қайд этилишича, Мунгиа бўй ва қўл узунлигида устун, аммо бу афзаллик унга фойда бермайди, агар у джебдан воз кечиб, яқин масофадаги урушга киришса. Мелиқўзиев рақибнинг айнан унинг олдида тўхтаб қолишини ёқтиради. У катта текис зарбалар остига шўнғиб, оёқларини қулай ҳолатга қўяди ва қабурғаларга қаттиқ ҳуклар йўллайди. Шу боис Мунгиа учун энг маъқул тактика — узоқ масофадан қаттиқ джеб билан ишлаш ва ўрта масофада очиқ алмашинувларга йўл қўймасликдир. Бироқ бунга эришиш учун ҳар бир раундда интизомни сақлаш талаб этилади — Мунгиа эса бу фазилатни тез-тез намоён эта олмайди. У зарба қабул қилган заҳоти деярли доим катта текис, узоқ сериялар билан жавоб қайтаради.

Мақолада таъкидланишича, Мелиқўзиевнинг ҳам камчиликлари бор. 2021 йилда Габриэль Росадо уни ҳаддан ташқари олдинга интилиш пайтида қарши олиб, битта ўнг қўл зарбаси билан оғир нокаутга учратган. Мунгиа зарба фаоллиги жиҳатидан бу заиф томондан фойдалана олади, аммо яқин масофадаги очиқ алмашинувлар жангни „кимнинг ияги мустаҳкамроқ“ деган очиқ тўқнашувга айлантириб юбориши мумкинлиги қайд этилган.