Бектемир Абдуманнонов: "Тажриба орттириб "Андижон"га қайтаман"

Суперлигамизда тўп суриб келаётган иқтидорли қанот ярим ҳимоячиларидан бири Бектемир Абдуманнонов янги мавсумни Самарқанднинг “Динамо” клубида бошлайдиган бўлди.

Бунгача икки мавсумни “Андижон”да ўтказиб, ўзиин кўрсата олган футболчи энди Вадим Абрамов қўл остида тўп суради.

Куни кеча Абдуманнонов Sports.uz сайтига интервью берди.

- Бектемир, “Динамо” клубига ўтишингиз қандай юз берди?

- Ассалому алайкум. “Динамо” жамоаси “Андижон”дан шартномамни сотиб олди. Шунинг учун кетишга қарор қилдим. Андижон халқига яна бир бор раҳмат айтаман, ишонганлари ва қўллаб-қувватлаганлари учун. Жамоа мухлислари, фан клуб раиси Нодир Тўйчиев ва унинг жамоасига, “Андижон” раҳбариятига миннатдорчилик билдираман. Ҳали тажриба орттириб “Андижон”га қайтаман. Жамоага омад тилайман.

- “Андижон”да ўтказган икки йиллик фаолиятингиздан қониқдингизми?

- “Андижон” энг яхши ўйинларимни, фаолиятимдаги кўтарилиш ўйинларни ўтказдим. “Андижон” билан Ўзбекистон Кубогини қўлга киритдик. Ҳаммаси яхши томонлама ҳал қилинди.

- Нима учун айнан “Динамо”ни танладингиз?

-  Жамоани ўйини ўзимни кўрсатиш имкониятига тўғри келгани учун танладим.

- Вадим Абрамов жамоаси билан нимани кўзлаяпсиз ва шахсий мақсадингиз қандай?

-  Худо хоҳласа, чемпионлик учун курашиш ва Ўзбекистон Кубогини қўлга киритиш.

- Янги жамоа, янги муҳит. Сизни қандай қарши олишди?

- Жамоада муҳит яхши даражада. Ҳаммаси танишларим ва илиқ кутиб олишди.

- Айтинг-чи, Абрамов билан илк суҳбат қандай кечди?

- Худо хоҳласа, ўзимни яхши кўрсатсам миллий терма жамоага тушиш учун ёрдам беришларини айтди. Ҳаммаси ўзимга боғлиқ, ҳаракат қилишда давом этишимни таъкидлади.

- Янги мавсумдан нима кутяпсиз?

- Голлар, ассистлар, ғалабалар, Кубок ютиш ва яхши даражага чиқиш.