Бектемир Абдуманнонов: "Динамо" билан камида битта соврин ютмоқчиман"

Қишки трансфер ойнасида «Динамо» футболчисига айланган Бектемир Абдуманнонов жамоа билан Дубайда янги мавсумга пухта ҳозирлик кўрди. Йиғин якунида «Динамо» матбуот хизмати Бектемир билан суҳбатлашиб, унинг жамоага келиши, мослашиши ва фаолиятига оид бир қатор саволларга жавоб олди.
 
- Бектемир, аввало «Динамо» таклифи сизда қачон ва қандай пайдо бўлди?

- Мавсум якунидан кейин Вадим Карленович таклиф қилдилар. «Андижон» билан Туркиядаги йиғинга йўл олгандим. У киши мени ўз жамоасида кўрмоқчи эканини айтди. «Динамо»даги ўйинларим орқали миллий жамоадан чақирув олишни мақсад қилдим ҳамда Вадим Абрамов бу борада ўсишимга ёрдам беришига ишониб, унинг қўл остида тўп суришга қарор қилдим. 

- Сизда бошқа таклифлар ҳам бўлган экан, «Динамо»ни танлашингизга қайси жиҳатлар туртки бўлди?

- Менга кўпроқ «Динамо»нинг ўйин жиҳати ёққани учун танладим. Чунки бу жамоани ўйинини кузатганман, ўйин услуби менга кўпроқ тушади. Ўзимни ўйинимга мос тушадигани учун ҳам жамоага келдим. 

- «Андижон»да ҳам сермаҳсуллик борасида яхши натижа кўрсатгансиз...

- Хомяков қўл остида тўп назоратига асосланган эмас, кўпроқ қарши ҳужумда ўйнардик. Аммо таркибда ўзгаришлар бўлгач, қолаверса бир йил ичида 2-3 мураббий ўзгаргач, кўп нарса ўзгариб кетди. Якунда хайрлашишга қарор қилдим.

- «Динамо»га мослашиш жараёни қийин кечмадими?

- Йўқ, ҳамма яхши кутиб олди. Ҳамма билан яхшиман, ўзи олдиндан ҳам аксарият ўйинчилар билан таниш эдим. Мисол учун, жамоадаги Улуғбек Абдуллаев билан футбол интернатида бирга ўқиганмиз. Умуман олганда, «Динамо» таркибидаги аксарият ўйинчилар худди акамдек. Ҳозир меҳмонхонада Фирдавс Абдураҳмонов билан бирга турибмиз, у билан яқинроқман, қолганлар билан ҳам яхши муносабатдамиз. Тезда киришиб кетдик, дейишим мумкин. Яхши коллектив йиғилган.

- «Андижон»да икки йил фаолият юритиб, ўсишга эришдингиз, кубокни қўлга киритдингиз. Жамоани тарк этиш қийин бўлгандир?

- Осон бўлмади. Аммо бу ўз ҳаётимни ҳал қиладиган ўзгаришлардан эди. У ерда қолишим катта таваккал бўларди. Чунки ўйнамаслигим 50/50 эди. Янги мураббий билан гаплашганимда «ҳаракат қилсанг, ўйнайсан» деди. Клубда икки йил барқарор ўйнагандим, аммо менга оддий ёш ўйинчидек қараётганини сездим. Шу боис ўзим кетишни хоҳладим. Ҳа, мухлислар бироз хафа бўлишди, аммо ўзим учун «Динамо»га ўтишим плюс деб ҳисоблайман. «Андижон» билан 60 йил деганда тарихидаги илк кубокни ютдик, мухлислар ажиотажи жуда кучли бўлди. Икки йилда кўп нарса ўргандим, кўп яхши хотиралар қолди.

- Александр Хомяков билан ишладингиз, сўнг қисқа муддат Самвел Бабаян қўл остида тўп сурдингиз, энди эса Вадим Абрамов мураббийлигидасиз. Айтингчи, бу мутахассисларнинг иш услуби бўйича қандай фарқларни сезяпсиз?

- Хомяковда кўпроқ ҳимоядан ўйнардик, Самвел акада ўртада иккинчи зонада кутиб, кўпроқ қарши ҳужумни пойлардик. Мураббий позицион тўғри ўйнашни ўргатади. Вадим Карленовичда эса ҳаммаси бор – тўпга эгалик қилиш, иккинчи зонада кутиш, прессинг, вақтида қарши ҳужумга ўтиш, зарур бўлганда ҳимоядан ўйнаш ҳам бор. Яъни, турли услублар мужассамлашган. Ярим ҳимоячи учун бу мураббий услуби кўпроқ мос – тўп билан эркин бўла оламан, кўрганимга тезроқ пас бераман, ўйлаш жиҳатим тезлашади. Яъни, аскардек эмас, эркин ижодкордек миянгиздаги ўйланмаларни ҳам бажара оласиз. «Андижон»да яккакурашлар кўп эди, бу жамоамда эса кўпроқ тўп билан муомалада бўламиз. Тўпни кераксиз жойда йўқотмаслик муҳим, бу ерда.

- Янги мавсумда «Динамо» билан қандай мақсадларни кўзлаяпсиз?

- Самарқанддаги фаолиятим орқали Ўзбекистон миллий жамоасидан чақирув олиш ва «Динамо» билан ҳам камида битта совринни ютмоқчиман. Шунинг учун ҳам шу ердаман. Ўтган мавсум кузатгандим, «Динамо» 2-ўринга жуда яқин эди, қолаверса кубок ярим финалида пенальтилар сериясида омади келмаганди. Финалга чиққанда «Динамо» аниқ кубокни оларди, деб ўйлайман. «Динамо»га қарши ўтган йилги ўйинларни ҳам эслайман. Ўшанда бизда бироз пасайиш бошланган, «Динамо» эса ўсишга эришаётган пайт эди. Андижонда сўнгги сонияларда мағлуб бўлгандик, Самарқандда ҳам «Динамо» устун келганди.

- «Динамо» билан Дубайда иккита йиғинда қатнашдингиз. Таассуротлар ва тайёргарлик ҳақида гапирсангиз...

- Энг аввало айтишим керак анча кучли ва яхши жамоалар билан ўйнадик. Бу ўйинлар ўзимиз учун ҳам катта тайёргарлик ва синов бўлди. Шу орқали тажриба орттирдик ва чемпионатга тайёрландик. Бу Суперлигада асқотиши аниқ.

- Йил бошида аввалги клубингиз билан Туркияда йиғинда қатнашдингиз, энди эса БААда тайёргарлик кўрдингиз. Икки мамлакатдаги йиғинлар бўйича қандай фарқлар яққол сезилди?

- Туркияда бошида йиғин қийинроқ ўтади – ёмғирлар, совуқ ҳаво, доимий намгарчиликлар, натижада кўп вақт спорт залида ўтиши мумкин. Дубайда эса футбол учун идеал шароитлар, мос иқлим. Режа асосида ўтади ҳаммаси. Ўз ўйинингизни кўрсата оласиз. Туркияда эса кучли шамоллар туфайли ўйинларда ҳам қийналасиз.

- Дубайдаги икки босқичли йиғинда жами 9 та ўйин ўтказилди. Қайси ўйинлар кўпроқ эсда қолди?

- ЦСКАга қарши баҳс голларга бой бўлгани ва ғалаба қозонганимиз эсда қоларли бўлди. «Зенит»га қарши баҳсда ҳам бемалол дурангга муносиб эдик, вазиятлардан фойдалана олсак ҳисоб тенг бўларди. «Локомотив» билан ўйинда эса 1-таймда кўп гол ўтказиб қўйдик, иккинчи бўлимда эса улардан яхшироқ ҳаракат қилдик. Орамизда катта фарқ йўқ эди, фақат улар бироз профессионалроқ ҳаракат қилишди. 

- Тасаввур қилинг, трансфер ойнасининг сўнгги кунлари, сизда қайсидир ўйинчини жамоага таклиф этиш имкони бўлганида кимларни «Динамо»га таклиф этган бўлардингиз?

- Собиқ жамоадошларимдан Шерзод Эсановни, Рустам Турдимуродовни, Фарҳод Соҳибжоновни айтган бўлардим. Бирга муваффақиятли тўп сурганмиз. Агар жамоани кучайтирадиган бир нафар ўйинчи дейилса Алижоновни кўрсатардим.

- Футболга кириб келган илк қадамларингизни ҳам эсласангиз...

- 2013 йил Жиззахдан «Бунёдкор» академиясига келганман. Бир йилдан кейин академияда мен таҳсил олган гуруҳни пуллик қилиб қўйишганди. Шу боис «Пахтакор» мактабига ўтишимга тўғри келган. Ўшанда Дилшод Нуралиев мени кўриб, академияга чақирган, шу тариқа клуб академиясига катта бўлганман десам бўлади. Қарийб 6 йил клуб тизимида бўлдим. «Пахтакор» ўринбосарларига ўтаётганимда Темур Кападзе «Олимпик»ка таклиф қилди, кейинчалик олимпия жамоаси аъзосига айландим. Орада «Металлург»да 1,5 йил ўйнаб, «Андижон»га ўтдим. Мураббийлардан миннатдорман. 

- Темур Кападзе ҳақида гапирдингиз. Айнан унинг мураббийлигидаги «Навбаҳор» 1-турда «Динамо» меҳмони бўлади. Абрамов ва Кападзе устоз-шогирд саналади, иккиси қўл остида ҳам ўйнадингиз, ўхшаш жиҳатлар нимада?

- Икки мураббийнинг ҳам ўйин услуби деярли бир хил. Иккала жамоа ҳам тўп билан кўп ҳаракат қилади, прессинг қилади. Бу ўйин зўр ўтади, ким яхшироқ тайёр бўлса, омад кулиб боқса ўша 3 очкога эга чиқади. Мезбон сифатида фақат ғалабага интиламиз. Ўйинга тайёрлаш бўйича ҳам ўхшаш ҳолатлар кўп. Икки мураббий ҳам ўйинчиларга катта босим қилмайди, ўйнаб кетиши учун қўллаб-қувватлайди, эркинлик бериб кўради. 

- Самарқанддаги очилиш ўйинини ҳозирдан тасаввур қиляпсизми? Андижондаги мухлисликдан кам бўлмаган ишқибозлар қаршисида ўйнайсиз...

- Албатта, ҳаммамиз кутяпмиз. Самарқандлик мухлислар стадионни тўлдиришига ишонамиз. «Ултрас»дек «Оқ Армия» фан-клуби ҳам ривожланиб бормоқда. Жамоа қанчалик яхши натижалар кўрсатиб турса, мухлислари ҳам ўсади. Масалан, Андижонда ҳам яхши ўйинлар кўрсатган пайтимиз мухлислар ҳам стадионни тўлдиришган, яхши ўйин ва яхши натижа бўлиб турса мухлислар стадионга келаверади. Шу орқали мухлислик ҳам, футболчилар ҳам ўсади.

- Суперлиганинг энг яхши 5 нафар футболчисини санаб ўтсангиз...

- Йил давомида барқарор ўйнаб келаётганлардан Ҳожиакбар Алижонов. Люпче Дориевни ҳам энг яхши легионерлардан бири деб биламан. Анваржон Ҳожимирзаев «Динамо»да икки йилдан бери жамоа тўпурари бўлиб келяпти. «Нефтчи»да Жамшид Искандеров жамоанинг чемпион бўлишига катта ҳисса қўшди. «Насаф»да Абдувоҳид Неъматов "стабил" ўйнаб келмоқда. Игор Сергеевни ҳам киритардим, аммо у Эрон чемпионатига кетиб қолди. 

- Футболдаги дастлабки маошингизни эслай оласизми?

- Албатта. «Пахтакор»да Биринчи лигада ўйнаб юрган пайтим 2016 йиллар эди, 1 миллион маош олардим.

- Қайси жамоалар иштирокидаги ўйинларни кузатиб борасиз?

- Ўзбекистон чемпионатини доим кузатаман. Шунингдек, Испанияда «Реал» ва «Барса» иштирокидаги баҳслар. Англияда «Сити» ўйинларига бефарқ эмасман. Футболчилардан Мбаппе, Винисиус, Рафинья, Ямал ўйинларини кузатиб бораман. Ўзим ҳам вақти келиб Европада тўп суришни мақсад қилганман.