“Барса” хўжайини “Реал” ҳақида қаттиқ гапирди

“Барселона”президенти Жоан Лапорта Мадриднинг “Реал” клуби томонидан Жозе Негрейра иши бўйича каталонияликларга нисбатан билдирилган айбловларга муносабат билдирди.

Аввалроқ «Реал» УЕФАга мазкур иш бўйича далиллар ва кўрсатмаларни ўз ичига олган, тахминан 50 минг саҳифадан иборат ҳужжатлар тўпламини тақдим этгани ҳақида хабар берилган эди.

- Негрейра ишига келсак, бизни суд жараёни бошланмасиданоқ айбдор деб топишга уринишганини қайта-қайта айтишдан чарчамайман. Ваҳоланки, бизни айблаш учун асос йўқлиги маълум бўлди. “Барселона”ни оқлайдиган ҳукм чиқишига тўлиқ ишонаман.

Бу масалани тинмай кўтариб чиқадиганлар “Барселона”га зарар етказишга ва унинг обрўсига путур етказишга уринмоқда. Ҳукм чиқарилганидан кейин бу ҳақда гапириш учун ҳам вақт топилади. Улар фақат “Барселона”ни обрўсизлантириш мақсадида бу масала атрофидаги баҳсларни давом эттириш учун қўлларидан келган барча ишни қилмоқда.

“Реал” бу ҳаракатлари билан футболга зарар етказмоқда. Улар ҳамма нарсага қарши чиқади. Сиз УЕФАга ёки лига раҳбариятига мурожаат қилмоқчи бўлсангиз ҳам, улар бунга қарши чиқади. Бу эса миллий ва халқаро миқёсда ўз нуфузи, эътирофи ҳамда обрўсини йўқотиб бораётган клуб ҳақида кўп нарсани англатади.

Бунга мисол сифатида EFC конгрессида иштирок этганимни айтишим мумкин. “Реал” эса у ерда ҳатто ўз вакили билан ҳам қатнашмади.

Улар ўзларини жуда кибрли ва ҳукмронликка интиладиган тарзда тутади. Нима қилаётганларини яхши билишади, аммо бу хатти-ҳаракатлар уларга нисбатан ишончнинг кескин пасайишига олиб келмоқда.

Суперлига масаласида ҳам худди шундай бўлди. Охир-оқибат улар бошқалар билан бирга қолади, аммо шу йўлда бошқа клубларга тўсиқ қўйишдан тўхтамайди. Менимча, бу борада ўз хатти-ҳаракатларини танқидий баҳолашлари керак эди, чунки бундай йўл тутиш муносиб эмас, - дея Лапортанинг сўзларини келтиради Sport.es.