“Барса”: Шундай зўр ҳужумчимиз бор экан, билмаган эканмиз

Испаниянинг амалдаги чемпиони “Барселона” клуби раҳбарияти испаниялик ҳужумчи Ферран Торреснинг келажаги бўйича қарорини ўзгартирди. Бу ҳақда Mundo Deportivo нашри хабар берди.

Манбага кўра, каталонияликлар жаҳон чемпионатидан кейин Торресни сотиб юбориш фикридан қайтган ва футболчи билан ҳамкорликни давом эттиришдан манфаатдор. Ферран жорий трансфер ойнасида сотиладиган ўйинчилар рўйхатидан чиқарилди.

Ла Лига амалдаги чемпионлари Торрес билан меҳнат шартномасини узайтиришни истамоқда. Унинг амалдаги шартномаси келаси йил ёзида якунланади.

Аввалроқ матбуотда 26 ёшли ҳужумчига ПСЖ қизиқиш билдираётгани ҳақида хабарлар тарқалган эди.

Ферран Торрес 2022 йилдан буён “Барселона” сафида тўп суриб келмоқда. Transfermarkt портали унинг бозор қийматини 55 миллион евро деб баҳолаган.

Эслатиб ўтамиз, 2026 йилги жаҳон чемпионатида айнан Ферран Торреснинг финалдаги ягона голи испанияликларнинг Аргентина устидан минимал ҳисобдаги ғалабасини таъминлади.