“Барса”: Қанчалик зўр ўйнама, ортга қайтмайсан!

Испаниянинг амалдаги чемпиони “Барселона” асосий таркибга кира олмаган ҳужумкор фуболчиси Ансу Фатини жорий мавсумда Франция чемпионатига жўнатиб юборган эди.

“Монако”га ижарага берилган ўйинчининг ишлари юришиб кетди. Фати янги жамоаси сафида еттита учрашувда рақиблар дарвозасини олти маротаба ишғол қилди.

Transfer News Live ва Sport каби манбаларнинг ёзишича, “Барселона” раҳбарияти Ансу Фати бўйича бир қарорга келиб бўлган. У қанчалик яхши ўйнамасин, барибир Ханс-Дитер Флик жамоаси таркибига қайтарилмайди.

Таъкидлаш лозимки, Ансу Фати “Барселона”нинг энг иқтидорли тарбияланувчиларидан ҳисобланади. Лионель Месси Каталонияни тарк этганида Ансу Фатини аргентиналик юлдузнинг вориси, деб эълон қилишга ва унга 10-рақамни топширишган эди.

Ўз даврида, “Барселона” раҳбарияти Ансу Фати учун “Манчестер Юнайтед” таклиф қилган 200 миллион еврони ҳам қабул қилмаган. Бироқ бир неча маротаба оғир жароҳат олганидан кейин ёш футболчи аввалги даражасига чиқа олмади ва охир-оқибат “Барса” учун керакмас ўйинчига айланди.