“Барса” грандлар сўраётган футболчисини қиммат баҳолаяпти

«Челси» ўтган ёзда ҳам қизиқиш билдирган «Барселона» ҳимоячиси Жюль Кундега яна эътибор қаратмоқда. Лондон клуби 27 ёшли футболчини қишки трансфер ойнасида сотиб олишга уриниб кўриши мумкин. Бу ҳақда Sport.es хабар берди.

Манба маълумотига кўра, Германиянинг «Бавария» клуби ҳам Франция терма жамоаси ҳимоячисининг ўйинларини кузатиб бормоқда.

Қайд этилишича, «Барселона» Кунденинг трансфери учун камида 50 миллион евро талаб қилади. Бироқ футболчининг ўзи каталонияликлар сафини тарк этишни истамаётгани айтилмоқда.

27 ёшли ҳимоячи жорий мавсумда барча мусобақалар доирасида бешта учрашувда майдонга тушиб, жами 261 дақиқа ўйнади. Унинг клуб билан амалдаги шартномаси 2030 йилнинг ёзигача мўлжалланган.

Transfermarkt портали маълумотларига кўра, футболчининг бозор қиймати 60 миллион еврони ташкил этади.