“Барса” футболчиси АПЛ грандларини қизиқтириб қўйди

Испаниянинг амалдаги чемпиони “Барселона” жамоада ўйнаб келаётган Франция миллий терма жамоаси ҳимоячиси Жюль Кунденинг ёзги трансфер ойнасида клубни тарк этишига рухсат бериши мумкин.

Mundo Deportivo маълумотларига кўра, 27 ёшли футболчи агар трансфер ойнаси ёпилгунига қадар “кўк-анорранглилар” қизиқарли таклиф олса, бу ёзда жамоани тарк этиши мумкин. “Арсенал”, “Манчестер Сити” ва “Ливерпуль” Кунде билан шартнома имзолашга қизиқиш билдираётган клублар қаторида экани айтилмоқда.

Ўтган мавсумда ҳимоячи барча мусобақаларни ҳисобга олганда 47 та ўйин ўтказиб, учта гол урди ва тўртта голли узатмани ўз ҳисобига ёзди.

Transfermarkt маълумотларига кўра, Кунденинг бозор баҳоси 60 миллион еврони ташкил этади.