"Барса" бирдан янги мураббий қидиришга тушди

"Барселона" жамоаси жисмоний тайёргарлик бўйича янги мураббий излашни фаол давом эттирмоқда. Жамоанинг бош мураббийи Ханс-Дитер Флик ушбу йўналишда штабини жиддий кучайтириш тарафдори.

Бундан аввалроқ клуб жисмоний тайёргарлик учун масъул бўлган Хули Тоуса билан ҳамкорликни тўхтатган эди. Сабаби – ўтган мавсумда жамоада жароҳатлар сони меъёрдан анча ошиб кетди ва мутахассис ўз вазифасини етарлича бажара олмади, деган хулоса қилинди.

Маълумотларга кўра, Флик янги мураббийни клуб академияси ёки ички тизимидан эмас, "Барселона"дан ташқарида изламоқчи. У катта тажрибага эга, юқори даражада ишлай оладиган мутахассисни топишни мақсад қилган.