Балотелли “Реал”га ўтмоқчи

Италия терма жамоаси ҳамда “Манчестер Сити”, “Интер”, “Ливерпуль” ҳамда “Милан” каби бир қатор клубларда ўйнаган Марио Балотелли яна топ-клуб формасини киймоқчи. Бу ҳақда Gazzetta dello Sport нашри маълум қилди.

Айни пайтда ишсиз юрган 34 ёшли футболчи “Реал” сафига қўшилишни орзу қилаётгани ва бунга тайёр эканини таъкидлади.

-  Орзум – “Реал” таркибида тўп тепиш. Ҳозир менга ишонч билдирадиган жамоа қидиряпман. Футболчилик фаолиятимни яна 2-3 йил давом эттириш ниятим бор, - деди Марио Балотелли.

Оғир характери билан кўплаб зиддиятли вазиятларга дучор бўлиб танилган Балотелли “топ-лигалар”дан ташқари орада Туркия ва Швейцария чемпионатида ҳам ўйнади.

Бир йил олдин “Женоа” Балотеллини А Серияга қайтарган эди. Бироқ бор-йўғи олти маротаба майдонга тушган футболчи иккита сариқ карточкадан бошқага ҳеч қандай самара келтиргани йўқ.