"Атлетико" ёзда етти нафар футболчи билан таркибни кучайтирмоқчи

Мадриднинг "Атлетико" клуби ёзги трансфер ойнасида кенг кўламли таркиб янгиланишини амалга оширишни режалаштирмоқда.

Клуб спорт директори Матеу Алемани чап ва марказий ҳимоячи, марказий ярим ҳимоячи, икки нафар вингер, ҳужумчи ҳамда Антуан Гризманн ўрнини босадиган футболчини жамоага олиб келишни мақсад қилган.

"Матрасчилар"нинг асосий трансфер мақсадларидан бири — "Челси" ҳимоячиси Марк Кукурельяни харид қилиш орқали чап қанотни кучайтириш ҳисобланади.

Шунингдек, "Манчестер Сити" ярим ҳимоячиси Бернарду Силва Гризманннинг вориси сифатида кўрилмоқда. Франциялик юлдуз фаолиятини АҚШнинг "Орландо" клубида давом эттирмоқда.

Бундан ташқари, мадридликлар ўтган мавсумни ижара асосида жамоада ўтказган "Ювентус" вингери Николас Гонсалеснинг трансфер ҳуқуқини тўлиқ сотиб олишни ҳам режалаштирмоқда.