Асроржон Омонов 7 партияда, 7 ғалабага эришди!

Ўзбекистон-3 сафида ўйнаётган 17 ёшли халқаро мастер Асроржон Омонов Самарқанддаги Олимпиадани қойилмақом ўтказмоқда. 

Ҳозиргача 7 партия ва барчасида ғалаба. Бу серияда у Мали вакили Ёуссоуф Ниаре, марокашлик Ноуреддине Мессала, яманлик  Айман Ал-Ҳалила, австриялик Валентин Баидетскйи, австралиялик Давид Смердон, жанубий африкалик Чарлтон Мняста ҳамда қирғизистонлик Тимур Даудовни мағлуб этди.

Айниқса, рейтинги Асроржондан юқори бўлган икки гроссмейстер Валентин Баидетскйи (2511) ва Давид Смердон (2461) устидан қозонилган ғалабалар эътиборга молик. 

Асроржоннинг амалдаги рейтинги 2347, Олимпиададаги рейтинг-перформанси эса 2976. Ҳозирда захира доскаси категориясида бу энг юқори кўрсаткич. 

Бугун Ўзбекистон-3 Андорра билан ўйнамоқда. Асроржон саккизинчи партиясини ўтказса, индивидуал медал учун зарур талабни ҳам бажаради.