Асенсио "Пачука"га қарши ўйинда олган қизил карточкасига муносабат билдирди

"Реал Мадрид" марказий ҳимоячиси Раул Асенсио Клублар ўртасидаги жаҳон чемпионатида "Пачука"га қарши гуруҳ босқичи учрашувида (3:1) олган қизил карточкасига муносабат билдирди. Испаниялик футболчи турнирни омадсиз бошлагани учун афсусда, аммо ўз ўйинини яхшилашга умид қилмоқда.

"Бу мусобақани ўзим хоҳлаганчалик бошлай олмадим, лекин вазиятни ўзгартиришимга ишончим комил. Энди иложи борича янада кўпроқ ишлаш ва ўсишда давом этиш вақти келди. Юборган барча хабарларингиз учун раҳмат," – деб ёзди Асенсио ўзининг ижтимоий тармоқлардаги саҳифасида.

Эслатиб ўтамиз, Асенсио ўйиннинг атиги 7-дақиқасида майдондан четлатилган эди. Шунга қарамай, "Реал" сон жиҳатдан камликда қолган бўлса ҳам, ғалабани қўлга киритди. Жамоа сафида Жуд Беллингем, Арда Гюлер ва Федерико Вальверде гол муаллифи бўлишди. Ҳимоячи 27 июнь куни "Ред Булл Залцбург"га қарши ўйналадиган 3-тур учрашувини ўтказиб юборади.