Асенсио: "Моуриньо билан ишлашни сабрсизлик билан кутяпман"

"Реал" ҳимоячиси Рауль Асенсио жамоанинг янги бош мураббийи Жозе Моуриньо билан ишлашни интиқлик билан кутаётганини маълум қилди.

Испаниялик футболчи португалиялик мутахассиснинг мадридликлар сафига қайтиши жамоа учун катта воқеа эканини таъкидлади.

"Ҳозир Моуриньонинг янги лойиҳаси бошланмоқда ва бу жуда ҳаяжонли. Мен ишни бошлашни сабрсизлик билан кутяпман.

2010 йилда мен ҳали кичик эдим, аммо унинг жамоани қандай ўзгартирганини кўрганман. У клубга рақобатбардошлик, иштиёқ ва матонат олиб кирганди.

Менимча, айнан шу сифатлар менинг футболчи сифатидаги хусусиятларимни ҳам ифодалайди. Шунинг учун у билан ишлашни жуда истайман", — деди Асенсио.

Шунингдек, ҳимоячи Моуриньо бошчилигида "Реал" сўнгги икки мавсумда Ла Лигада чемпион бўлган "Барселона"дан устун келиб, чемпионликни қайтариб олиши мумкинлиги ҳақидаги саволга ҳам жавоб берди.

"Албатта. У бу борада рекорд ўрнатган. Энди биз ҳам шуни такрорлашга ҳаракат қиламиз", — дея қўшимча қилди футболчи.

Эслатиб ўтамиз, Жозе Моуриньо аввал ҳам 2010–2013 йиллар оралиғида "Реал"ни бошқарган ва клуб билан Ла Лига, Испания Кубоги ҳамда Испания Суперкубогини қўлга киритган.