“Арсенал”нинг суперталант бўйича таклифи рад этилди

Англиянинг «Лестер» клуби «Арсенал»нинг иқтидорли ёш футболчи Жереми Монгани сотиб олиш бўйича таклифини рад этди.

The Times нашри маълумотига кўра, «Арсенал» 16 ёшли Монга учун дастлаб 5 миллион фунт стерлинг ҳамда футболчининг кейинги трансферидан тушадиган маблағнинг 10 фоизини таклиф қилган. Аммо бу таклиф «Лестер»нинг кутган даражасига ҳатто яқин ҳам эмас.

«Лестер» ўз навбатида Монга учун 10 миллион фунт стерлинг ва кейинги сотувдан 15 фоиз улуш талаб қилмоқда.

Кутилишича, икки клуб музокараларни давом эттиради. Футболчининг ўзи эса бошқа барча вариантлардан кўра «Арсенал»га ўтишни афзал кўрмоқда. Шу боис томонлар ўзаро келишувга эришиш эҳтимоли юқори баҳоланмоқда.

Агар икки клуб муросага кела олмаса ҳам, Монга барибир «Арсенал»га ўтиши мумкин. Бундай ҳолатда компенсация миқдорини махсус трибунал белгилайди.