Арбелоа “Реал”да қайси юлдузлар билан келиша олмаётгани ошкор этилди

Мадриднинг “Реал” клубида январь ойида Хаби Алонсо кетганидан кейин жамоани қабул қилиб олган бош мураббий Альваро Арбелоанинг келажагига оид шубҳалар кучаймоқда, деб хабар берди The Athletic.

Манбага кўра, клуб раҳбарияти, жумладан президент Флорентино Перес ҳам, мутахассиснинг бундай вазифага тайёрлигига бошидан тўлиқ ишонмаган.

Шунга қарамай, унинг ишига якуний баҳо мавсум тугагач берилиши режалаштирилган.

Вазиятни нафақат жамоа натижалари, балки ички муҳитдаги кескинлик ҳам мураккаблаштирмоқда. Хусусан, Арбелоа билан жамоа сардори Дани Карвахаль ўртасида келишмовчиликлар пайдо бўлган, футболчи ўйин амалиёти камлигидан норозилигини очиқ айтди.

Бундан ташқари, ярим ҳимоячи Дани Себальос “Бетис”га қарши ўйин қайдномасига киртилмаган. Себальос ҳам вазиятдан норози ва ёзда жамоани тарк этиши мумкин.

Қайд этилишича, айрим футболчилар мураббийнинг таркиб танлаш усулини бирёқлама ва адолатсиз деб ҳисоблаб, унга эътироз билдира бошлади.