Арбелоа: "Реал" баъзи ўйинларда очко йўқотмаслиги керак эди"

"Реал" бош мураббийи Альваро Арбелоа жамоанинг жорий мавсумдаги натижаларига баҳо берди.

"Менимча, баҳо беришни сизлар — журналистлар ўзингиз амалга оширишингиз керак. Мен ҳар доим айтганимдек, бу ерда ўз фаолиятим ҳақида гапириш учунман. Ҳа, биз кўплаб ўйинларда ғалаба қозона олмадик, айниқса, очко йўқотмаслигимиз керак бўлган рақибларга қарши баҳсларда. Айнан шундай ўйинлар энг кўп афсус уйғотади.

Энг яхши ўйинларимизни ўзимизга тенг, кучли рақибларга қарши ўтказяпмиз. Аммо шундай ўйинлар борки, агар Ла Лига учун курашмоқчи бўлсак, "Реал" у ерда очко йўқотишга ҳақли эмас.

Шу билан бирга, назорат қилиш қийин бўлган ҳолатлар ҳам бор ва улар жуда тез-тез такрорланяпти. Буни ўтган ҳафта "Бетис" (1:1) ва "Жирона" (1:1)га қарши ўйинларда ҳам кўрдик, бошқа учрашувларда ҳам шундай ҳолатлар бўлган. Аммо бу каби вазиятлар мавжудлиги бизда ҳали ўсиш учун жой борлигини инкор этмайди", — деди Арбелоа.