АҚШнинг ўзбек футболчиларига қилган муносабати норозиликларга сабаб бўлди!
- 9-июн, 17:34
- Zohir Toshxo’jayev
- 1
- Футбол
ФИФА таснифидаги энг нуфузли мусобақа – 2026 йилги жаҳон чемпионати бошланишига бир неча кун қолганида бир қатор мамлакатлар миллий терма жамоалари АҚШ ҳукумати томонидан қўлланилаётган кучайтирилган хавфсизлик текширувлари, узоқ давом этган сўроқлар ва чегара назоратидаги муаммоларга дуч келмоқда.
Энг катта муҳокамага сабаб бўлган ҳолатлардан бири Ўзбекистон миллий терма жамоаси билан боғлиқ бўлди. ESPN телеканали журналисти Луис Карлос Ларго тарқатган видеода Ўзбекистон делегацияси Нью-Йоркда Нидерландияга қарши ўртоқлик учрашуви олдидан хизмат итлари ва металл қидирув қурилмалари ёрдамида текширилаётгани акс этган.
Видеолар ижтимоий тармоқларда тез тарқалиб, кўплаб мухлислар ва фойдаланувчилар бундай хавфсизлик чораларини ортиқча, деб баҳолашди.
Қўшимча муҳокамаларга Motivaciones Fútbol футбол саҳифасининг хабари ҳам сабаб бўлди. Унда Ўзбекистон терма жамоаси оддий ўртоқлик учрашуви учун жуда қаттиқ хавфсизлик протоколига дуч келгани таъкидланган. Шунингдек, хавфсизлик хизмати ходимларидан бири терма жамоа вакилига сумкалардан узоқроқ туришни буюргани айтилган.
Ироқ термаси вакили 7 соат сўроқ қилинди
Ўзбекистон футболчилари дуч келган ҳолат ягона ноқулай вазият эмас. Ироқ миллий терма жамоаси ҳужумчиси Айман Ҳусайн Чикаго халқаро аэропортига келганида қарийб етти соат давомида сўроқ қилинган.
Reuters агентлиги маълумотига кўра, текширув вақтида ҳуқуқни муҳофаза қилувчи органлар унинг мобил телефонини ҳам кўздан кечирган. Кейинчалик футболчига мамлакатга киришга рухсат берилган.
Шу билан бирга, терма жамоа фотографи Талал Салоҳ ўн соатдан зиёд текширувдан ўтказилган ва якунда АҚШ ҳудудига киритилмаган. Америка миграция хизмати мазкур ҳолат юзасидан изоҳ бермаган.
Сенегал термаси ҳам қўшимча текширувдан ўтди
Африкалик журналист Микки Жуниор тарқатган видеода Сенегал миллий терма жамоаси футболчилари багажлари ёнида кутиб тургани, хавфсизлик ходимлари эса қўшимча текширув ўтказаётгани тасвирланган.
Кадрларда футболчилардан бири терминалга киришидан олдин мобил металл қидирув қурилмаси билан текширилгани ҳам кўринади.
Ҳозирча расмий баёнот йўқ
Ҳозирга қадар ФИФА, Ўзбекистон футбол ассоциацияси, Сенегал футбол федерацияси ёки АҚШ расмий идоралари ушбу ҳолатлар бўйича расмий баёнот бермаган.
Бироқ ижтимоий тармоқларда айрим мамлакатлардан келган иштирокчиларга нисбатан муносабат ҳақида қизғин баҳслар бошланиб кетган.
Ҳакам ҳам АҚШга киритилмади
Аввалроқ сомалилик ҳакам Омар Артан ҳам Майами аэропортида АҚШга кириш ҳуқуқини ололмагани маълум бўлган эди.
АҚШ Божхона ва чегара хизмати унинг кириши “текширув жараёни билан боғлиқ муаммолар” туфайли рад этилганини маълум қилди, аммо қўшимча тафсилотларни ошкор этмади.
Жаҳон чемпионати ҳақида
“Жаҳон чемпионати-2026” АҚШ, Мексика ва Канаданинг мезбонлигида ўтказилади. Турнир тарихда илк бор 48 та миллий терма жамоа иштирокида ташкил этилмоқда.
Мусобақа 11 июнь куни Мексика ва Жанубий Африка Республикаси терма жамоалари ўртасидаги учрашув билан старт олади. Мукофот жамғармаси эса 655 миллион доллар этиб белгиланган.