АҚШ Ироқнинг 5 футболчисига виза беришни рад этди. Улар орасида “Пахтакор” футболчиси ҳам бор

Ироқ терма жамоасининг бир нечта футболчилари жаҳон чемпионатида иштирок этиш учун АҚШга виза олишда муаммога дуч келишди.

Ироқ футбол федерацияси вакили Ғолиб Ал-Замилийнинг сўзларига кўра, АҚШ номаълум сабабларга кўра миллий терма жамоанинг беш нафар футболчиси – Иброҳим Баеш, Моҳанад Али, Ҳайдар Абдул Карим, Али Ал-Ҳамадий ва “Пахтакор” ҳимоячиси Заид Таҳсинга виза беришни рад этган.

Ал-Замилий виза олиш рад этилган футболчилар терма жамоанинг асосий ўйинчилари эканини таъкидлади. Ироқ футбол федерацияси бу масала бўйича тезкор ечим топиш мақсадида ФИФА билан боғланади.

ЖЧ-2026 11 июндан 19 июлгача АҚШ, Канада ва Мексикада бўлиб ўтади. Ироқ терма жамоаси гуруҳ босқичида Франция, Норвегия ва Сенегал жамоалари билан куч синашади.