АПЛда яна хорижлик мураббий чемпион бўлди

“Арсенал” бош мураббийи Микель Артета фаолиятида илк бор Англия Премьер-лигасида чемпионликни қўлга киритди.

Шу тариқа, АПЛ тарихида яна бир бор хорижлик мутахассис чемпионга айланди. Премьер-лига ташкил этилганидан буён бирор марта ҳам англиялик мураббий чемпионликка эриша олмаган.

Энг кўп чемпионлик сэр Алекс Фергюсон ҳисобига тўғри келади — шотландиялик мураббий 13 марта ғолиб чиққан. Испаниялик Пеп Гвардиола 6 та, португалиялик Жозе Моуринью ва франциялик Арсен Венгер эса 3 тадан чемпионликни қўлга киритган.

Шунингдек, АПЛда Карло Анчелотти, Антонио Конте, Роберто Манчини, Клаудио Раньери, Мануэль Пеллегрини, Кенни Далглиш, Юрген Клопп ва Арне Слот каби мураббийлар ҳам чемпион бўлган.

Охирги марта англиялик мураббий мамлакат чемпионлигини 1991/92 мавсумида ютиб олган эди. Ўшанда Ҳовард Уилкинсон “Лидс” билан ғолиб чиққан. Бу эса Премьер-лига ташкил этилмасидан олдинги сўнгги мавсум ҳисобланади.