АПЛда энг узоқ ўйнаётган “отахонлар”

Англия Премьер-лигаси энг мураккаб чемпионатлардан ҳисобланади. Лекин лига футболчилари орасида жамоасига содиқ қолаётган ўйинчилар ҳам бор.

Sports.uz портали ана шу “отахон” футболчилар билан таништиради.

1. Уго Льорис, “Тоттенхэм” – 11 йил, бир ой.

Франциялик дарвозабон 2012 йилнинг ёзида “Лион”дан “Тоттенхэм”га ўтган. 36 ёшли посбон “шпорлар” дарвозасини 447 та учрашувида қўриқлади. Янги мавсумда жойини Гульельмо Викариога бой берган бўлса-да, жамоага содиқ қолган ҳолда, бошқа таклифларни рад этди.

1. Жоэл Уорд, “Кристал Пэлас” – 11 йил, тўрт ой.

Ҳимоячи Жоэл Уорд 2012 йили “Кристал Пэлас” сафига қўшилган ва жамоанинг Премьер-лигага чиқишига ҳисса қўшган. 33 ёшли футболчи бугуни кунга қадар 336 та ўйин ўтказди ва ҳамон сафда.

1. Пол Даммит, “Ньюкасл Юнайтед” – 12 йил, 3 ой.

Пол Даммит “қарғалар” тарбияланувчиси ҳисобланади ва икки марта бошқа клубларда ижара асосида ўйнаган холос. Фаолиятининг қолган қисмида ҳар доим “янги шаҳарликлар”га содиқ қолган.

1. Льюис Дунк, “Брайтон” – 14 йил, 3 ой.

“Брайтон” тарбиялаган футболчи асосий таркибга 2010 йили қўшилган. Клуб раҳбарияти ҳимоячини ҳеч қачон қўйиб юбормаган. Дунк Англия терма жамоасида ўйнаган даврда унга талаб кўп бўлган. Ҳатто футболчи 2015 йили ўзини трансферга қўйишларини талаб қилган. Бироқ у ҳамон “Брайтон”да жавлон уряпти.

1. Симус Коулман, “Эвертон” – 14 йил, 8 ой.

“Эвертон” ирландиялик ҳимоячини 2009 йили арзимаган нархга трансфер қилган. Симус 2010 йили бир мавсум “Блэкпул”да ижарада ўйнаб келди. Шундан бери у фақат “Эвертон” учун тўп тепиб келмоқда. 2015 йили Луи Ван Гал уни “Манчестер Юнайтед”га чақириб, трансферга кўндира олмаган.