Англиянинг энг зўр ҳимоячиси Ҳусановга қандай баҳо берди?
- 13-май, 16:14
- Zohir Toshxo’jayev
- 0
- Футбол
Англия Премьер-лигасининг иккинчи қисмида “Манчестер Сити” ҳимояси марказида вужудга келган Абдуқодир Ҳусанов ва Марк Гехи тандеми мухлису мутахассислар эътирофига сазовор бўлмоқда.
Аслида жорий мавсум бошланганида Абдуқодир Хосеп Гвардиола жамоасида асосан захира ўйинчиси ҳисобланарди. Вазият тақозоси билан Ҳусанов мавсумни ўнг қанот ҳимоячиси сифатида бошлади. Жароҳатлардан кейин бу позицияни Матеуш Нуньеш тўлиқ ўзиники қилди.
Бироқ, “Сити” ҳимояси марказида Йошко Гвардиол, Жон Стоунз ва Рубен Диашнинг жароҳатланиши Абдуқодирга янги имконият яратди. Қишки трансферлар ойнаси даврида “Манчестер Сити” Англия Премьер-лигасининг энг зўр марказий ҳимоячиси Марк Гехини трансфер қилди.
Шундан сўнг, Хосеп Гвардиола марказий ҳимояни Абдуқодир Ҳусанов ва Марк Гехига топширди. Бу футболчилар фавқулодда ишончли ўйин намойиш қила бошлади ва жамоанинг ютуқларига катта ҳисса қўшиб келмоқда.
Айнан шу икки марказий ҳимоячи жуфтлигини Хосеп Гвардиола “шаҳарликлар”нинг сўнгги ўйинларининг кўпчилигида афзал кўрмоқда. Марк Гехи майдонда Абдуқодир Ҳусанов билан биргаликда ўйнаш ҳақида фикр билдирди.
- Менга Ҳусанов билан ўйнаш жуда ёқади. Абдуқодир ажойиб футболчи ва ундан ҳам яхши инсон. Мен бирга ўйнаган ҳар бир футболчидан кўп нарса ўргандим, жумладан Рубен Диаш ва Натан Акедан ҳам.
Умид қиламанки, Абдуқодир билан биргаликда “Манчестер Сити” ҳимоясида барқарорликни таъминлашда давом этамиз, - деди Марк Гехи.
Жорий мавсумда 22 ёшли ўзбек футболчиси барча турнирларда 34 та учрашувда иштирок этди. Абдуқодир бу ўйинларнинг аксариятида бошланғич таркибдан жой олган.
Чемпионатнинг биринчи қисмини “Кристал Пэлас”да ўтказган ва кейинчалик “Манчестер Сити”га кўчиб ўтган 25 ёшли Марк Гехи ҳар икки жамоадаги ўйинларини қўшиб ҳисоблаганда 50 марта майдонга тушди, бештадан гол ва ассист қайд этди.