"Андижон"нинг янги бош мураббийи: "Мухлисларимизни хурсанд қиладиган футболни олиб кирмоқчимиз"

Хабарингиз бор, кеча “Андижон” жамоасига янги бош мураббий сифатида Ислом Аҳмедов тайинланди. Бунгача мураббийлар штабида ишлаб келган мутахассисда энди мустақил равишда ўзини кўрсатиш учун яхши имконият пайдо бўлди. Клуб матбуот хизмати эса янги лавозимда иш бошлаган Ислом Ғуломовичдан дастлабки интервюни олди. 

- "Андижон" клуби бош мураббийлиги сизга топширилди. Бундай тайинловга муносабатингиз қандай бўлди ва ўзингизни ҳар томонлама тайёрман деб ҳисоблайсизми?

- Ассалому алайкум. Очиғи, бу тайинлов кутилмаганда бўлди. Сабаби, мен бу ерга Самвел Вячеславовичдан иш ўрганиб, катта муҳитга мослашиш бўйича келгандим. Лекин вазият тақозоси билан шунақа ўзгариш юз берди. Лекин орзу қилиб, вақти келиб, катта футболда мураббий сифатида ишлашимни билардим. Бироқ воқеалар ривожи бунчалик тез тус олишини ўйламагандим. Футбол академияси жамоасида икки йил биринчи лигада профессионал мураббийлик қилганим менга ҳозирги иш жараёнимда жуда асқотяпти.

- Жамоа 7-турдан кейин турнир жадвалида 14-поғонада боряпти. Вазиятни ўнглаш учун эътиборни аввало нимага қаратмоқдасиз?

- Биласизми, бошқача ҳолатда биз учун бундай имконият бўлмаслиги аниқ эди. Сабаби, ўз олдига юқори ўринларни эгаллаш вазифаси қўйилган жамоада энди иш бошлаётган ёш мураббийга имконият берилиши қийин жараён ҳисобланарди. Аммо бизга бу жуда яхши тажриба ва синов бўлади. Айниқса, мураббийлик салоҳиятини оширишда бу ҳол қўл келади. Авваламбор, ҳозирда жамоамиз бироз тушкун аҳволда. Сабаби, 5 та мағлубият жуда ёқимсиз. Шу боис аввало, бундай ҳолатда ички муҳитни янада яхшилаб, кўтаринкилик олиб кириш, уларни руҳан кўтариш, ўзига бўлган ишончини қайтариш бўйича кўпроқ иш олиб боряпмиз. Худо хоҳласа, қўлдан келганича билим ва тажрибаларимиздан келиб чиқиб вазиятни ўзгартиришга ҳаракат қиламиз. Футболчиларга ўзига бўлган ишончини қайтарсак албатта яхши бўлиб кетиши керак. Чунки уларни потенсиалци юқори. Мухлисларимизни қўллаб-қувватлаши билан албатта ижобий ўзгаришлар бўлади, деган умиддаман. 

- Ёш мураббий сифатида бу ўзингизни кўрсатиш учун яхши имкониятдир. Шундай экан, қандай янгиликларга қўл урмоқчисиз?

- Ҳар бир мураббийни ўз фалсафаси бўлади. Олдинги ишлаган жойимда ҳам ўзимни футбол фалсафамга эга эдим. Бу ерда эса янада қўшимча иш ўрганиб, тажриба орттириш эди. Аввало, футболчиларга ишонч! Суперлига ўйинларини кўп кузатаман. Хоҳлайсизми-йўқми, биринчи ўринда натижа туради. Олдинги ишлаган жойимда ёшларни терма жамоаларга, катта клубларга тайёрлаш эди. Ҳозир эса энди биринчи ўринга натижа чиқади. Биз шундай йўл тутамизки, ўйинчиларимизга эркинлик бериб, қўрқмасдан ўз имкониятларидан фойдаланиб, футболдан роҳатланишларини таъминлаб берамиз. Биз уларга йўналиш берамиз ва ўзлари танлашади. Машғулотларимизни ўзгартирганмиз. Асосан тўп назоратига, тўпсиз майдонни назорат қилишга ва яна бир қанча иш жараёнлари бўйича эътиборни кучайтирганмиз. Худо хоҳласа, бошқача футбол ўйнашади. Клуб раҳбарияти бизни ҳар томонлама қўллаб-қувватламоқда. Ишлаш учун барча шароитлар етарлича. Қўяётган фалсафамизни футболчилар қанча тез ўзларига сингдириб боришса шунча яхши бўлади ва бу вазиятдан тез чиқиб кетамиз. 

- Мураббийлар штабингиз ҳақида ҳам тўхталиб ўтсангиз.

- Жисмоний тайёргарлик бўйича Бранко Чирич ишини давом эттирмоқда. Аналитик мутахассисимиз ҳам биз билан бирга. Бундан ташқари, ҳозирда Ўзбекистондаги тажрибали, ёш ва изланувчи мураббий Сергей Арслоновни ёрдамга чақиргандик ва у йўқ демасдан келди. Унга катта раҳмат айтамиз. Ўзимизни андижонлик дарвозабонлар мураббийи Бекзод Турғуновни ҳам таклиф қилганмиз. Штабимиз асосан шижоатли ёш мураббийлардан ташкил топган. Бу эса биз мураббийлар учун янги чақирув. Сергей Арслонов олдин бундай вазиятларда ишлагани учун уни тажрибаси бизга катта қўл келади.