Ана холос: WBO ташкилоти Александр Усикни қаттиқ огоҳлантирди!

Бутунжаҳон бокс ташкилоти (WBО) раҳбарияти мутлақ жаҳон чемпиони, 38 ёшли Александр Усикдан соғлиғи юзасидан янгиланган тиббий хулоса тақдим этишни талаб қилди. Бу ҳақда "Boxing Scene" портали хабар берди.

Бунга сабаб сифатида ижтимоий тармоқларда Усикнинг рақс тушаётган видеоси тарқалиши кўрсатилган. WBО комиссияси эса боксчининг соғлиғи ҳақидаги расмий маълумотларда аниқ ва асосли далиллар бўлиши кераклигини таъкидлади.

“Тиббий хулоса батафсил ва пухта бўлиши, унда жаноб Усикнинг жорий соғлиқ ҳолати, тикланиш прогнози ва бошқа тасдиқловчи маълумотлар келтирилиши шарт. Комиссия изоҳсиз кечикиш ёки ноаниқликка йўл қўя олмайди. Агар бу талаб бажарилмаса, биз WBО низомларига мувофиқ тегишли чоралар кўришга мажбур бўламиз”, — дейилади ташкилотнинг титул жанглари бўйича қўмитаси раиси Луис Батиста Саласнинг Усик вакилига йўллаган мактубида.

Аввалроқ, Усик соғлиғидаги муаммолар сабабли WBО йўналишидаги камарга мажбурий даъвогар ҳисобланган Жозеф Паркер билан жангни кечиктиришни сўраган эди.