Ана холос! "Реал" ҳужумчиси икки ўйинга дисквалификация қилинди

Франко Мастантуоно жазоланди. Аввал хабар қилинганидек, "Реал" вингери "Хетафе"га қарши баҳс (0:1) сўнгги дақиқаларида бош ҳакам Алехандро Муньисга эътироз билдириб, бир неча бор "қандай шармандалик, қандай жирканч шармандалик" дея норозилик билдиргани учун майдондан четлатилган эди.

Испания Қироллик футбол федерацияси интизом қўмитаси қарорига кўра, аргентиналик футболчи икки ўйинга дисквалификация қилинди.

Шунингдек, "Реал" ҳимоячилари Дин Хёйсен ва Альваро Каррерас ҳам сариқ карточкалар сони кўпайиб кетгани сабабли бир ўйиндан четлатилди.

Шу тариқа, учала футболчи ҳам 6 март куни "Сельта"га қарши сафар учрашувини ўтказиб юборади. Мастантуоно эса бундан ташқари 14 март куни "Эльче"га қарши уй учрашувида ҳам майдонга туша олмайди.