Ана холос: Лазизбек Мулложонов допинг қоидаларини бузганликда гумонланмоқда

Халқаро Тест Агентлиги (ITA) маълум қилишича, 2025 йил 11 июнь куни мусобақадан ташқари ўтказилган допинг назорати чоғида ўзбекистонлик боксчи Лазизбек Мулложоновдан олинган намунада "methasterone" моддаси – анаболик-андрогеник стероид аниқланган.

"Methasterone" моддаси Бутунжаҳон Антидопинг Агентлиги (WADA) томонидан тақиқланган моддалар рўйхатига киритилган бўлиб, С1.1 бўлим остида ҳар қандай вақтда – мусобақа давомида ҳам, ундан ташқарида ҳам – қўлланиши қатъиян ман этилган. Бу модда мушак массасини тез ошириш, куч ва қувватни кўпайтириш хусусиятлари билан танилган синтетик анаболик стероид ҳисобланади.

Спортчига бу ҳолат ҳақида расмий равишда хабар берилган ва у “Б” намунани таҳлил қилишни сўраш ҳуқуқига эга. Агар “Б” намунаси ҳам худди шундай натижани кўрсатса, бу ҳолат допинг қоидаларини бузиш сифатида расман тасдиқланади. Агар спортчи “Б” намунани текширтирмаса, бу ҳолда ҳам қоидабузарлик ҳолати сифатида қаралади. Шу билан бирга, спортчига бу натижага изоҳ бериш имконияти берилади.

Шунингдек, Жаҳон бокс антидопинг қоидаларининг 7.4.1-моддасига мувофиқ, спортчига мажбурий вақтинча четлаштириш (provisional suspension) жазоси қўлланилган. Спортчи бу четлаштиришга қарши шикоят киритиш ва уни бекор қилишни сўраш ҳуқуқига эга.