Альварес оддий рақиблар билан ўйнамайди, у “Реал”га қарши тўқнашувни кутяпти

Мадриднинг “Атлетико” клуби ҳужумчиси Хулиан Альварес Ла Лиганинг 20 сентябрь  куни 7-турида бўлиб ўтадиган “Реал”га қарши учрашувгача тикланишни мақсад қилган.

Marca нашри хабар беришича, аргентиналик футболчи шанба кунги машғулотни муддатидан олдин якунлашга мажбур бўлганидан кейин ўтказилган тиббий текширув унинг жиддий жароҳат олмаганини кўрсатган.

Манба маълумотига кўра, Альварес УЕФА Чемпионлар лигаси умумий босқичининг 1-турида “Ливерпуль”га қарши (1:2) учрашувни ноқулайлик ҳис қилган ҳолда якунлаган. Ушбу баҳсда аргентиналик футболчи мавсумда биринчи марта тўлиқ 90 дақиқа ўйнаган. Бу 2026 йилги жаҳон чемпионати ва ўзининг келажаги борасидаги ноаниқлик сабаб мавсумолди тайёргарлиги тўлиқ ўтмагани фонида юз берган.

Маълум қилинишича, Альварес ва мадридликларнинг яна бир ҳужумчиси Александер Сёрлот Ла Лиганинг 6-турида “Осасуна”га қарши 16 сентябрь куни бўладиган учрашув олдидан умумий гуруҳда машғулот ўтказмади. Учрашув олдидан жамоа ихтиёридаги ягона ҳужумчи Жонатан Дэвид бўлиб турибди.

Жонатан Дэвид ёзги трансфер ойнасида Италиянинг “Ювентус” клубидан “Атлетико”га ўтган. Сёрлот ва Альварес йўқлигида канадалик футболчи 13 сентябрь куни “Реал Сосьедад”га қарши  учрашувда дебют голини урди ва жамоасининг 3:0 ҳисобидаги ғалабасига ҳисса қўшди.