Альварес: "Атлетико"нинг ҳужум чизиғи Европада энг кучлиларидан бири"

Мадриднинг "Атлетико" клуби ҳужумчиси Хулиан Альварес "Реал"га қарши дербидаги йирик ғалабадан сўнг (5:2) жамоанинг кучли томонини айтди.

25 ёшли аргентиналик футболчи дербида дубль қайд этди ва учрашув қаҳрамонига айланди. Яна биттадан голга Робин ле Норман, Александр Сорлот ва Антуан Гризманн муаллифлик қилди.

"Танаффусда мураббий ҳужумни давом эттиришимизни айтди. Вазиятлар яратдик ва улардан самарали фойдалана олдик. Ла Лигада гол уриш учун энг кўп имконият яратяпмиз, бу борада Европада энг яхшилар қаторидамиз. Бу сафар совуққонлик қилдик, фарқ мана шунда", - деди шанба кунги жангнинг энг яхши ўйинчиси деб топилган Альварес интервьюда.

"Атлетико" Ла Лига 7-туридан кейин 12 очко билан мусобақа жадвалида 4-ўринда бормоқда.