Альварес “Атлетико” машғулотларига келмай қўйди

Аргентиналик ҳужумчи Хулиан Альварес кетма-кет учинчи кун Мадриднинг “Атлетико” клуби жамоавий машғулотларида иштирок этмади. Бу ҳақда Mundo Deportivo хабар берди.

“Атлетико”да ушбу вазиятни Альвареснинг ўзини ёмон ҳис қилаётгани билан изоҳлашмоқда. Бироқ аргентиналик футболчининг жорий жамоасини тарк этиш истаги борлиги ҳақидаги миш-мишлар фонида бу ҳолат футбол жамоатчилигида қизиқиш уйғотмоқда.

Аввалроқ Мадрид клуби бош директори Мигель Анхель Хиль “Барселона”нинг ҳужумчини ўз сафига қўшиб олишга бўлган уринишини кескин рад этган эди.

Cope маълумотига кўра, Альвареснинг ўзи ҳам бу ёзда унинг келажаги атрофида юзага келган вазиятдан қаттиқ хавотирда.

23 август, якшанба куни Альварес янги мавсумда Мадрид клуби сафида биринчи марта майдонга тушди. Аргентиналик футболчи Ла Лиганинг 2-турида “Вильярреал”га қарши уй учрашувининг иккинчи бўлимида захирадан майдонга чиқди. Учрашув 2:2 ҳисобида якунланган.

Альвареснинг қайтиши “матрасчилар” мухлисларининг салбий муносабати билан кечди — ишқибозлар учрашув давомида футболчини ҳуштакбозлик билан кутиб олишди.