Аллегри Модричдан ўз тажрибасини ёш жамоадошларига ўргатишини талаб қиляпти

"Милан" футболчиси Лука Модрич жамоа бош мураббийи Массимилиано Аллегрининг талаблари ҳақида сўзлади.

Хорватиялик ярим ҳимоячи ҳам, италиялик мураббий сингари, ёзда клубга келган эди. 39 ёшли футболчи "россонерилар"га А Сериядаги илк ғалабасини қўлга киритишда ёрдам берди ва иккинчи тур доирасида "Лечче"га қарши ўйинда (2:0) голли узатмани амалга оширди.

- Аллегри мендан майдондаги ҳаракатларимиз равон бўлишини таъминлашимни сўраяпти. Шунингдек, мураббий ўйинлар давомида жамоадошларим билан доимий равишда мулоқот қилишимни истайди, сабаби жамоамизда ёш футболчилар кўп, уларда ишонч уйғотиш зарур, - деди Модрич.

Италияга кўчиб ўтишидан олдин ярим ҳимоячи 13 йил давомида Мадриднинг "Реал" клубида ўйнаган ва уни эркин агент сифатида тарк этган эди.