Аллегри "Арсенал"га қарши ўйиндан кейин "Милан"нинг ҳолатига баҳо берди

"Милан" бош мураббийи Массимилиано Аллегри Сингапурда "Арсенал"га қарши ўтказилган ўртоқлик учрашувидан сўнг (0:1) жамоа ҳолати ҳақида фикр билдирди.

"Европанинг энг кучли жамоаларидан бирига қарши яхши спарринг ўтказилди. Бор-йўғи 15 кун тайёргарлик кўрганимизга қарамай, кўрганларимдан мамнунман - ўрганиш ва такомиллашиш учун вақтимиз бор. 
 
Ўйинчиларнинг меҳнат қилишга интилишини кўрдим ва тўпсиз ҳаракатланишда фидойилигимиз ошди. Шунга қарамай, яхшироқ фойдаланишимиз мумкин бўлган бир нечта вазиятлар ҳам юз берди. Шубҳасиз, янада ривожланишимиз керак, лекин бажарилган ишдан мамнунман. 
 
Ўртоқлик учрашувда бўлса ҳам, мағлубиятдан ҳеч қачон тўлиқ қониқмайман, аммо ҳозир мавсумга яхши тайёргарлик кўриш муҳим. Шуни эътиборга олиш керакки, бизга Европанинг энг кучли жамоаларидан бири рақиблик қилди. Бир соат давомида улар билан тенг ўйин кўрсатдик. Бу ҳам катта ютуқ" — дея таъриф бериб ўтди миланликларнинг янги мутахассиси.