Александр Волкановски: "Мовсар Евлоев мен учун муаммо туғдирмайди"

Ярим енгил вазнда амалдаги UFC чемпиони Александр Волкановски россиялик Мовсар Евлоев ушбу дивизиондаги энг кучли даъвогар эканини, аммо барибир австралиялик учун муаммо туғдирмаслигини таъкидлади. 

"Мовсар қандай ғалаба қозонишни билади. Ахир у шу пайтгача мағлуб бўлмаган ва мен уни ўзимдан кейин дивизионнинг энг яхши жангчиси деб ҳисоблайман. Менимча, у бошқа ҳар қандай ярим енгил вазн тоифасидаги ММА устасини мағлуб эта олади. Аммо услубий қарама-қаршилик ҳақида гапирадиган бўлсак, ўйлашимча, Евлоев мен учун энг қулай рақиблардан бири. У бошқалар учун жиддий муаммо, лекин мен учун эмас.

Мовсар бошқа йигитларга қарагандан универсалроқ, унинг бой арсенали, кўплаб кўникмалари ва жанг олиб бориш вариантлари мавжуд. Бироқ бошқа рақибларга катта муаммо туғдирадиган барча нарсалар мен учун мутлақо муаммо эмас

25 дақиқалик жангларда мени мағлуб этиш жуда қийин. Ислом, албатта, мени енгди. Бу ерда мен унга тан беришим керак. Лекин бошқа ҳеч ким 25 дақиқа давомида каминадан яхшироқ ҳаракат қила олмайди. Биламан, Мовсар учун бу ғалаба қозонишнинг одатий йўли, лекин мен билан бундай найранг ўтмайди. Бунга чиндан ҳам ишонаман. Гарчи россияликни жуда ҳурмат қилсам-да, унинг ҳаракатлари самарасиз эканини биламан", - деди австралиялик спортчи Меган Оливига берган интервьюсида.

Эслатиб ўтамиз, Волкановски ва Евлоев ўртасидаги чемпионлик жанги 24 октябрь куни Абу-Дабидаги "UFC 333" турнирида ўтказилади.