"Ал Ҳилол" мураббийининг "Навбаҳор" ва ҳакамлик борасидаги кескин фикрларига Даврон Файзиев ўз муносабатини билдирди

ОЧЛ 1-турида "Навбаҳор" сафарда "Ал Ҳилол" билан 1:1 ҳисобида дуранг ўйнади. Учрашувдан сўнг мезбонлар бош мураббийи Жорже Жезуш матбуот анжуманида рақибнинг ҳаракатларидан норози бўлиб, анча кескин фикрлар билдирди.

Португалиялик мутахассиснинг айтишича, "Навбаҳор" футболчилари атайин вақтни чўзган. Қолаверса, ҳакамнинг савияси ҳам рақибники билан бир хил, дея камситган. Ушбу фикрларга таниқли шарҳловчи Даврон Файзиев телеграмдаги саҳифасида ўз муносабатини билдирди.

"Навбаҳор" ниманинг эвазига "Ал Ҳилол"дан очко олди? - Даврон Файзиевдан жавоб

- "Ал Ҳилол" бош мураббийи Жорже Жезуш ўйиндан кейин эмоцияга берилиб гапирибди шекили. 35 йиллик фаолиятимда бундай вақт чўзишни кўрмаганман дебди. Биз, осиёлик мухлислар бу гапга шунчаки кулиб қўйдик. Ҳакам савияси рақибга яраша дебди. Бу эса ҳурматсизлик. Ўзи шундоғам Осиёда энг кучлилардан бўлган жамоанг трансферлар учун яна 300 миллион сарфлади, агар шу шароитда ҳам ҳимоявий футболга қарши чора қўллашни билмасанг, демак ниманидир нотўғри қиляпсан. Ҳакам битта жиддий хато қилди, Неймарга қизил бермади, - деди Даврон Файзиев.