"Ал-Файҳа" бош мураббийи: "Пахтакор" яхши ўйнади. Уларда 2-3 та яхши имконият бўлди, аммо гол ура олишмади"

Осиё Чемпионлар лигаси 6-туридан ўрин олган "Пахтакор" - "Ал Файҳа" баҳси бўлиб ўтди. Мазкур беллашувда тошкентликлар йирик 1:4 ҳисобида мағлуб бўлди. 

Учрашувдан сўнг саудияликлар бош мураббийи Вук Рашович матбуот анжуманида ўз фикрлари билан ўртоқлашди.

"Хайрли кеч, ҳаммага! Ушбу ўйин олдидан бизда бир қатор муаммолар бор эди. Жароҳат олган футболчиларимиз кўп эди. Бугунги натижа учун йигитларга раҳмат айтаман, улардан фахрланаман! Футболчилар ишончимизни тўла оқлай билишди. 

Футболда ҳеч нарса тасодифий эмас. Биз бу ғалаба учун анча тер тўкдик ва мақсадимизга эришдик. Йигитлар биз берган кўрсатмалар асосида муносиб ўйин намойиш этди. 

"Пахтакор" яхши ўйнади. Уларда 2-3 та яхши имконият бўлди, аммо гол ура олишмади. Биз эса вазиятлардан унумли фойдалана олдик. Айнан мана шу ҳолат бизнинг ғолиб бўлишимизни таъминлади. 

Футболчиларимизнинг кўпи ёшлар эканини инобатга олсак, уларда ҳали тажриба етарли эмас. Таркибимизда йигитларнинг кўпи вақт чўзгани йўқ. Сиз эътибор қаратган вазиятлар ёш футболчиларимиз билан содир бўлди. 

Бизнинг биринчи таймда гол уришимиз жуда муҳим эди ва биз буни уддаладик. Сўнг иккинчи бўлим учун режалар ишлаб чиқдим. Йигитлар ҳам шу режа ва тактик ишланмалар бўйича ҳаракат қилишди. Бугун ҳар томонлама учрашувдан қониқиш ҳосил қилдим", - деди мутахассис.