Абдуқодир Ҳусанов нима сабабдан "Брентфорд"га қарши ўйинда қайдномадан ҳам жой олмади?

Хабарингиз бор, бугун Хосеп Гвардиола бошчилигидаги "Манчестер Сити" ўз майдонида "Брентфорд"ни қабул қилади. Ушбу учрашув учун таркиблар эълон қилинди. Қизиқ томони шуки, ҳамюртимиз Абдуқодир Ҳусанов қайдномадан ҳам жой олмади.

"Манчестер Сити" клубининг маълумотига кўра, вакилимиз бўлажак беллашувга тўлиқ тайёр эмас. Шу сабаб, Ҳусанов бугун таркибдан тушиб қолган. Унинг "Евертон"га қарши ўйинда зарба қилиб олгани, бироқ жароҳат жиддий эмаслиги таъкидланмоқда.

Шунингдек, узоқ муддатли жароҳатдан чиққан Йошко Гвардиол ҳам машғулотларга қайтган бўлса-да, ўйинда иштирок этмайди.

Шу билан бирга, Рубен Диаш март ойидаги "Реал Мадрид"га қарши учрашувдан бери илк бор жамоа қайдномасига киритилди.

Маълумот ўрнида, агар "Манчестер Сити" бугун ғалаба қозонса, "Арсенал" билан орадаги фарқ икки очкога қисқаради. Мавсум тугашига эса учта тур қолди.